呢排行過電器舖，啲售貨員猛咁sell我買高清數碼電視機，話年底數碼電視廣播，要有高清電視機先至睇到高清效果。小妹對於呢啲新科技真係唔係好識，心郁郁都好想買。不過，我咁精明，梗係問吓我嘅消委會老友攞意見先。
老友話，睇數碼廣播係一定要有高清數碼電視機，但係呢個階段，有高清電視機都未必睇到免費數碼頻道，仲要加裝一個外置嘅數碼電視解碼器先睇到；因為內置解碼器嘅高清電視機，都未咁快有得賣。
出年先有得睇
影音專家李柏權就話，內置解碼機嘅高清電視機真係有排都未推出巿面，如果你本身已經買咗部高清電視機，不妨今年底買部外置解碼先睹為快，價錢都係五、六百元。
不過，老友笑笑口同我講，就算我有晒高清電視、買埋解碼器，都未必有得睇，因為我住西貢。點解呀？因數碼電視廣播今年底覆蓋嘅範圍，主要係港島同九龍區，新界剩係得沙田。西貢、荃灣、大埔、天水圍、元朗、屯門咁，要都出年年底先有得睇。
逢周一至周四刊出