陳小春同應采兒嘅曖昧關係,來自本報喺個幾月前率先踢爆女方到小春康樂園寓所共度24歲生日,前日下晝佢哋不避嫌到中環ifc商場揀相機、買電腦,但俾記者再次撞破,其後小春即刻搵細佬同一名中女掩護離開,博大家轉移視線。
搵中女做掩護
上月踏入男人40嘅小春,都應該正正經經識番個女朋友啦,前日佢同應采兒逛商場難得心情大靚,舉晒勝利手勢,不過小春好保護對方,馬上嚟個亁坤大挪移,喺夜晚11點幾揸車接載手挽一袋戰利品嘅細佬及一名中女離開中環,直去跑馬地放低中女,其間小春見記者影相,都係木口木面,而馮仁昭噚日打畀應采兒,佢就話自己因為識人賣電腦,所以帶小春去睇吓啫。
其實小春同應采兒嘅感情狀況相當撲朔迷離,早排應采兒同內地男星黃曉明掟煲,佢喺blog上不時透露失戀心情,但呢期佢寫blog風騷到爆,不單止轉性玩煮飯仔,學整藍莓芝士蛋糕,仲上載自己喺內地拍劇時同一名男士嘅合照,相中嘅應采兒髮尾盡濕,喺房內圍上毛巾包住身體,都咪話唔誘人。
應采兒又喺blog上自爆鍾意hiphop同rap嘅音樂,品味同至愛唱呢類歌同打扮嘅小春一致;當講到自己嘅生活喜好時,又話自己「喜歡,就是淡淡的愛;愛,就是深深的喜歡」,真係令人好有聯想。
應采兒blog:
http://blog.sina.com.cn/s/blog_4ab6c39101000a8n.html