利物浦前任隊長希比亞嚟緊好可能搵到頭新主人家，聽講紅軍會將佢賣到富咸，但先要領隊賓尼廸斯尋求替補人選。如果希比亞真係過檔富咸，以佢6呎5吋（1米96）嘅身高，再拍住6呎6吋（1米98）嘅禮特，莫講話英超聯，就算全球計都肯定係最高嘅中堅雙塔組合！
富咸出手斟希比亞
希比亞近季隨住年紀漸大，喺利物浦已經俾丹尼爾艾格取代咗正選位置。其實，今次富咸開出嘅條件都好吸引，就係確保希比亞喺冇傷冇病底下，一定可以獲得正選席位；而轉會費更開到150萬鎊（約2,300萬港元），以希比亞就快33歲嚟講，相信紅軍都會放人，但要自己夠中堅用先好噃。
遮晒龍門影響視線
再睇富咸原有陣容，中堅位置最搶鏡一定係高佬禮特，如果加埋身高又係6呎幾嘅希比亞，呢對雙塔組合啲高空波仲唔贏晒？真係有啲NBA球員都冇佢哋咁高啦，試問當一個前鋒去到禁區，突然殺出希比亞同禮特，分分鐘連個龍門都俾呢兩個高佬遮晒，點射門先？就算佢哋速度係慢啲，但係起碼影響到射手嘅視線吖！咪話冇用呀！
最重要係，富咸門將尼美同希比亞一樣都係芬蘭人，大家同聲同氣底下，對防線肯定有利。加上希比亞私底下同尼美好鬼老友，後者過多個禮拜就可以傷癒復出，希比亞呢個時候嚟咪啱晒「貪銘」囉！富咸領隊山齊士又幾識計數喎！