九鐵落馬洲支線同福田口岸啓用,梗係大件事,九鐵班末代董事局成員離任前最後一個集體活動,應該就係齊齊經新支線到福田口岸,然後再坐深圳地鐵去羅湖。主席田二少噚日帶隊過關,喺旁邊排隊過關嘅內地人,見到呢班人俾大批記者簇擁,以為佢哋係大明星,竟然爭住埋去影相攞簽名。
成班董事浩浩蕩蕩去到深圳地鐵皇崗站,上咗車之後,九鐵職員點吓人頭,忽然有人喊驚咁聲,話唔見咗其中一個董事羅榮生律師。職員好緊張打手機,先知道因為人太多,羅生迫唔到上地鐵,「滯留」皇崗站,九鐵即刻通知深圳地鐵職員,搵人送羅生到羅湖,同田二少重聚,大家等齊人先過境返歸。