上星期五中午去飲茶，出街方知風大，心諗點解呢，風球將近解除咯噃。飲完茶，望吓皇后戲院大電視，唉吔，八號風球已掛出，急忙返回公司，執好嘢叫秘書鬆人。點知秘書好醒目咁話：「未夠三點就走？下面畢打街塞滿車，地鐵站一定好多人，不如等多個零鐘頭先。」想落有道理，打電話畀鄰居C：「喂，有冇揸車返工呀，走嘅時候車埋我！」鄰居C回報：「我啲同事走落灣仔地鐵站，見到拉晒閘，人頭湧湧，入唔到去，已經上番晒嚟，我趁機捉住佢哋開會，你等一個鐘頭先。」有人做司機，唔怕等吖。
半個鐘頭後，三點三十五分，財務C打電話嚟：「喂交通大亂，我揸住架車過西隧，喺干諾道行唔郁，過紅隧條車龍仲衰。」香港好耐冇打風咯，大家幾乎唔記得如何應付。一聽見八號風球就趕住返屋企，唔記得交通系統與道路難以應付突如其來嘅大擠塞。卒之等到四點半，大道中竟然冇乜車行，鄰居C開車自灣仔嚟到ClubMonaco門口，唔使十分鐘，見交通咁暢順，大家決定轉上鏞記買燒鵝、翠華買魚蛋，返屋企一齊食飯。買完過西隧，好快就返到屋企，打電話畀財務C，佢早一個鐘頭開車，竟然都係回家早幾分鐘啫。
左丁山秘書就五點鐘先至落中環地鐵站，避過一劫，因為次日睇報紙，三點幾嗰陣，啲中環OL在地鐵站內逼到面紅耳熱，有人焗暈，有人流淚，個個焗到身水身汗。地鐵站嘅溫度高，已是常識，遠在廖秀冬推動政府機構內辦公室氣溫不可低過二十五度之時，十幾年前地鐵為咗慳電費，已將地鐵站內嘅空調調校到二十四、五度左右，一年四季如是。一旦發生上星期五下午嘅情況，地鐵站內擠上幾千人，而車站經理遵照守則，不敢將冷氣溫度調低（或者技術上不可行），裏面嘅人群有乜辦法唔熱到好似焗桑拿？好多人焗汗之時，大罵天文台，甚至連帕布都鬧埋一份。鬧呢個颱風點解急轉彎，去而復返。原來帕布Pabuk係立陶苑（Lithuania）文字，屬俚語，係「留多一陣間」或「多坐一會」咁解，帕布去而復返，正是名副其實。