美股近排走勢反覆，好似喺8月3日（星期五）大瀉281點，到8月6日（星期一）又升番286點，令人對後市感到迷惘。《華爾街日報》做咗項調查：「升市定跌市較能反映美國經濟同股市前景？」結果有成58%網民揀跌市，只有42%人揀升市，顯示多數網友睇淡美股前景。
有網民喺《香港討論區》問：「美股又升又跌，究竟玩乜？」2打6股民回應：「又升又跌係大戶派貨格，啲大戶唔可以一嘢出晒貨，所以出出吓都要扯番高少少，等啲接貨嘅散戶開心吓，升升跌跌，跟住美股就會終極一跌，表演大插水。」
jebphg喺《華爾街日報》討論區話：「由於美國嘅次按風波對信貸市場有幾大影響，仲係未知之數，所以美股呢排大上大落。相信要到8月尾至會稍為明朗化，到時美股可能冇咁反覆。」
有網民講笑咁話：「港股嘅秋官效應眾所周知，每逢藝人鄭少秋主演嘅電視劇出街，港股多數冇運行；美股亦受『格林斯潘效應』影響。格老係美國聯邦儲備局前主席，佢喺今年2月26日警告：『美國經濟可能陷入衰退』，結果全球股市喺27日大冧。」
超級碗指標睇升跌
專家話，秋官效應唔係香港獨有，美國投資界亦有唔少類似無厘頭嘅股市指標，例如「超級碗股市指標」。超級碗係美式足球聯盟（NFL）每年嘅冠軍賽，由嚟自AFC同NFL嘅隊伍作賽，如果AFC隊勝出，呢一年美股可能反覆下跌，相反NFL隊獲勝，咁美股升市嘅機會就比較大。