豬牛羊大豆粟米乜都加價，內地通脹每個月例升4%，咁強勁嘅CPI，阿爺㩒都㩒唔住。經濟學人信息部（EIU）嘅企業組織總監歐陽平（RossO'Brien），噚日喺一個財經論壇就炮轟中央，話過去宏調根本冇料到，睇怕過咗秋季嘅「十七大」全國黨代表大會，人事接班穩定晒，先至會有較為重手嘅調控政策出台。
講到人人自危嘅次按問題，O'Brien話，呢鋪美國有五成機會步入衰退，命中率仲不斷增加，如果唔好彩批中，肯定拖累中國嘅出口表現。
華華聽到有啲擔心，佢即刻派定心丸指，內地暫時多數輸出低檔日用品，美國人點窮都會用，況且祖國內銷比重日漸增加，應該可以抵銷番啲負面影響。