無論電視台好，報紙又好，家陣都要搞網站博客，以𠵱家幾乎全民皆股嘅時勢，唔搞理財、講股呢瓣，就真係蝕章！
好似新人事新作風嘅亞洲電視（ATV），為迎接高清亦為同無記撼過，一早響咗話新招陸續有嚟，頭炮就係財經新聞！今個月27號推出「理財博客」嘅節目，逢禮拜一至五早午兩個時段播，講吓中港美股、油價同一啲鮮為人知嘅另類投資等，仲會整埋msn畀觀眾做股票查詢。
邊個係主持？佢叫殷莉，伊人響美國柏克萊分校修傳理系同公眾演說，有10幾年電視/網絡電視主持經驗，喺CNN香港辦事處做過採訪，製作過外滙金融資訊節目，每晚分析即市美股同講歐亞股市。
佢仲係98年香港小姐「國際親善大使」獎得主，咁嘅底，好明顯係有腦有樣。