近排豪宅市場熱火朝天，連城中名人也趕入市。科大經濟發展研究中心主任雷鼎鳴（圖）投資理財梗係掂啦，佢睇好中國發展前景，舊年趁中資股勢旺，買入中移動（941）同工商銀行（1398）呢啲攻守兼備嘅股份。
買向南樓自住
唔知係咪雷教授覺得近排股市風高浪急，為咗穩陣計，將部份資金轉投樓市，用千幾萬買咗個荔枝角曼克頓山大單位。
據做成呢宗買賣嘅中原地產營業董事林偉文話，雷教授鍾情新地品牌，猛讚新地樓有質素，位置好，用料豪，加埋呢個盤係現樓，佢睇完樓唔夠兩日，就扑槌豪擲1330萬買咗1座低層B室，單位1755呎，呎價7578元。層數係低咗啲，不過勝在向南，所謂千金難買向南樓，仲可眺望中環維港海景，打算買嚟自住。
雷教授之前好似冇投資過物業，今次突然出手買樓，仲一買就過千萬，咁勇，唔通豪宅市場仲有排旺？