李東生掌舵嘅TCL集團，前幾日派上學期成績表，捱咗3年終於轉虧為盈，李生亦好感慨咁同大陸傳媒話，最困難嘅時間已過去。不過，佢減持公司股份嘅舉動，竟顯示年屆50嘅佢，又進入人生另一階段──又離婚變單身一族！
內地和訊網報道，李生減持咗2439.06萬股TCL，減持原因係「非交易過戶（財產分割）」，記者仲搵埋律師解釋咩原因會導致財產分割，其中一種就係離婚，而TCL董事會辦公室啲人仲話傳咗咁耐，大家都知係咩一回事，唔需要再喺背後講人嘅隱私咁話，即係幫李生認咗囉！
男人離婚要三思
咁點解離婚？當然只有當事人先知，但睇睇李生響05年再婚，娶咗女強人魏雪（亞洲女性發展協會創辦人），咁佢可以分到幾多身家呢？以每股5蚊人仔（4至6月尾，TCL股價一直企響5蚊樓上）計，淨係響TCL呢舊，都骨到1.2億……所以，天下男人離婚前應該三思！