世紀城市（355）話，同國企中國核工業集團旗下公司中國原子能工業，一齊開發蒙古嘅鈾礦，雙方簽咗意向書，刺激噚日股價一度急升29.4%，但喺高位沽壓沉重，最終升幅收窄至14%，收報0.26元。
Pandamanman問：「合作搵鈾？乜鈾唔係用嚟做核彈㗎咩，咁咪即係發展核武，會唔會俾啲美國佬抦㗎。」
xaixai就話：「理得啲鈾用嚟做乜啫，最重要係呢個消息可以炒起股價。」victim_for_ever好同意：「最緊要佢係好『鈾』，唔係淡『鈾』就得啦。」
仲未落實 因住得個桔
不過，Goodwalker就對世城有啲保留，「又係意向書，咁即係仲未落實，得個吹水啦！」Choku亦話：「唔係話黑心，因住個『城』係空城，得個桔呀！」
Bt4me話：「之前買就話啫，𠵱家先嚟高追，隨時走都走唔切喎。」小驚小驚話：「唔奢望佢會升幾多蚊，只希望返番去之前高追個價。」
今年4月初，世城曾宣佈在美國搞天然氣項目，股價一日內急升七成，至今年高位0.44元，較噚日收市價跌咗40.9%。
http://www2.discuss.com.hk/viewthread.php?tid=5010295&extra=page%3D6&page=1