聯洲國際（048）場大龍鳳有新進展。公司噚日刊發通告，之前講明公司會全力支持嘅執行董事及公司秘書黃偉光，原來喺星期一已經辭晒所有職務，20日前先話力撐，20日後又走，張通告話請辭原因係黃偉光出任聯洲大股東PeninsulaInternationalLimited（PIL）董事，有利益衝突喎。乜黃偉光唔係一直都係PIL董事咩，乜忽然間先至有利益衝突？
係龍係蛇 等睇報告
聯洲話，黃偉光咁做，無非想確保公司利益，話公司董事會同佢冇意見不合。聯洲仲講明，黃先生雖然離公司而去，但仍會就畢馬威會計師所做緊嘅財務評審，提供協助。
呢件事，華華有兩個地方唔明。第一，當黃偉光因鈞濠（115）案被廉署起訴後，聯洲喺7月25日即時飛身出嚟「挺黃」，但點解唔夠1個月就轉軚呢？第二，其實好多上市公司董事都有做大股東控股公司董事，若果有問題，咪好多董事要一齊起身？
有市場人士同華華講，其實黃偉光都唔係咁想走，但債權銀行好似唔再信佢，所以叫佢不如唞唞，唔好再成為聯洲嘅負資產。不過，亦有人話，其實𠵱家佢走唔走已唔緊要，因為股價同形象都已搞成咁，係龍係蛇，最緊要睇畢馬威份報告。
至於接班人，係管理聯洲旗下歐洲業務財務嘅JuergenHolzschuh，佢喺禮拜一做咗執董。無論結局係點，天要下雨，娘要嫁人，有些事情任你扭盡六壬，都解決唔到。
[email protected]
