時間：1995年12月9日
地點：無綫清水灣電視城
人物：梁漢文
經過：乜嘢叫做禍從口出？相信梁漢文（梁炳）絕對可以好清楚咁話畀大家知，佢當年就係因為衰多口講錯嘢，搞到俾無綫即時雪藏。事發喺1995年12月9日，梁炳喺無綫清水灣電視城為《歡樂滿東華》直播演出，點知佢喺大合唱期間，突然爆出一句：「唔好咁X嘈！」呢句粗口都即時出埋街，搞到無綫高層好㷫，即刻將佢雪藏，甚至取消佢角逐《勁歌》最受歡迎男歌手獎。
同年12月15日，梁炳為爆粗開記者會公開認錯同道歉，當日佢話大合唱時係夾口形，可能節目去到尾聲時，全世界都好疲倦，所以大家都抱住好興奮心情去完成最後呢part，部份歌手更加一路唱一路玩，梁炳見場面又混亂又嘈，一時心急同𤷪𤺧之下先至爆咗句粗口，講完之後佢都好後悔，又話同所有家庭觀眾以及歌迷講對唔住，又話保證以後唔會再咁做。
無綫雪藏梁漢文，雪到96年3月先至解凍，安排佢為《港姐儷影繽紛荷李活》做表演嘉賓，雪藏幾個月就冇事，梁炳真係執番身彩，其實當年爆粗事件令梁炳人氣不跌反升，舊年佢為無綫主持嘅《美女廚房》，仲更加令佢人氣再次飆升㖭！