嫌麥記每個月得一場直播賽事，唔夠喉？其實你手上只要揸住部3G機，一樣可以睇超英！講緊嘅係PCCWMobile「nowSports」頻道，月費最平$68，已包括7條頻道及4,000分鐘視像串流！嘩，就算你一個月睇足24場比賽（已經好多喇），都只係用咗2,160分鐘，咁剩低嗰1,840分鐘，仲可以煲埋其他精華賽事片段，抵過睇nowTV（月費$218）㖭！再畀多30蚊，仲可以欣賞高清版本，最啱OL上班族放工消夜直落喪睇，更唔怕俾人話細細個手機芒乜都睇唔到！
記者：陳國輝
攝影：陳偉強
Model：Chimpy
開OT靜雞雞睇「早場」
唔係每間公司都有咁好福利，電視長開任你睇！即使有，亦好難想像成班同事圍住部電視一邊隊啤、一邊剝花生講波嘅情景。如果撞啱星期六有英超「早場」（7點左右），而你又開緊OT，咁點算好？最佳辦法，就係用Hands-free塞住耳仔，然後靜雞雞開着手機睇波，一嚟唔怕老闆知，二嚟唔驚嘈親人，呢招簡直一石二鳥！最抵死係，「nowSports」提供埋英超時間表、出場陣容、甚至乎對賽往績等數據，就算開緊OT，想落波膽都仲嚟得切。
手機睇高清唔起格
電視玩高清同手機玩高清，究竟有乜分別？嗱，呢項「HDonmobile」服務，其實並非LCDTV所用嘅720p、1080i或1080p技術。所謂「手機高清」只有320×240解像度，雖然兩者差別極大，不過喺2至3吋手機屏幕上觀看，效果已叫唔錯。小記試睇咗半場英超賽事，畫面流暢之餘，更極少出現因動作太快而引致嘅起格問題，下面有幾款賽事畫面，不妨參考吓。
大人細路分唔清
唱球會歌嗰陣，其實出面有班小朋友，好明顯大人同細路已經分唔到。但話說回來，手機畫面只有2、3吋，Zoom全景梗係乜都睇唔到啦！
他信變咗靚仔
鏡頭一ZoomIn，就認得出佢係曼城老闆他信！無論人臉輪廓抑或膚色表現，都算清楚，但面上嘅細微皺紋就完全逃過一劫，當堂白淨咗。
草地冇層次感
當然唔係講普耶件波衫啦！Zoom到雞乸咁大隻，冇可能睇唔到！不過，背景嗰片綠油油嘅草地認真失敗，好似Key咗佈景上去咁，零層次感。
勉強認出阿瑜
老實講，唔係因為聽慣佢把聲，我估未必認出左手邊嘅男人就係蔡育瑜。至於右手邊嘅評述員又係邊位？真係要靠啲記憶力幫吓手喇！
總結：
特別舒服；再加上手機電池唔捱得耐，就算夠你睇足3場賽事，然而你嘅精神、肉體都未必頂得順啦！
波迷又點睇？
Davy「我喺上環返工，每日來回屋企大概要90分鐘，如果坐定定喺巴士睇波應該冇問題，不過有時間我都寧願瞓覺叉電，長時間對住個手機芒好辛苦㗎！」
Kenneth「遇啱約朋友出夜街，我會選擇用手機睇直播英超，但係得自己睇，班Friends又睇唔到，好自私啫！所以我寧願睇精華入球片段，唔使90分鐘對到實。」
大文「我踢開波嘅，本身去茶餐廳睇多。手機睇波都幾新鮮，可以一試，不過最驚手機唔夠電用，睇到80分鐘突然間熄咗機，都幾冇癮㗎！」
阿章「所謂嘅手機HD畫面似乎差少少喎！好彩睇緊波嗰陣，畫面上方有比數顯示，不過球衣顏色仲係矇查查，喺屋企睇電視好過。」
收費詳情
1.$68/4,000分鐘
2.$98/4,000分鐘（高清版）
3.$198/無限任睇（高清版）+4,000分鐘通話
查詢：PCCW（28881888）