每月得一埸　麥記播英超好過冇

連麥記都直播英超？唔係咁誇嘛！大家唔好咁開心住，因為由8月26日起，只有21間分店有直播睇，每月更係直播一場咁大把。況且睇波好自然想食嘢，相信你都唔想餐餐食薯條和漢堡包。畀得起錢嘅，當然會揀茶記同酒吧先，所以免費波只啱一班消費力低嘅𡃁仔𡃁妹，叫做有着數，好過冇啦！

記者︰陸俊雄
攝影︰梁細權

最低零消費　森美阿葛照撐

雖然大部份24小時和朗豪坊麥記於8月26日先正式直播英超，但早前已經在金鐘海富中心分店，大搞KickOffParty，試播一場車仔對伯明翰，而且仲搵埋森美和阿葛到場睇波。佢哋兩個會在8月18日至9月1日期間，做「nowTVFootbag熱鬥」「的波比賽」嘅主持。

■森美：「去麥記睇，連幾十蚊最低消費都慳埋。」

森美唔係逢波必睇，直言認識英格蘭國家隊比較多，當晚佢支持車仔話︰「我知邊個係鐵人林柏特㗎！」至於阿葛，睇曼聯比較多，但佢話︰「我一向唔會支持某隊球隊或球星，我係睇TeamSpirit，冇態，曼聯都變水鬼。」言下之意，同森美打對台。講到去邊度睇波多，森美即刻話︰「酒吧、茶餐廳都有睇過，但喺麥記睇最大好處係冇最低消費。年紀比較細嗰班又負擔到，環境又冇咁雜，阿媽聽到個仔去麥記睇都放心好多。」至於阿葛話比較少出街睇︰「有時係一大班人做緊嘢睇，以往多數上朋友屋企睇多，知道其中一個朋友屋企有得睇，跟手成班Friend上晒去，睇波想熱鬧啫！」所以多一個地方有得聚埋睇波，消費者當然無任歡迎。

■阿葛：「當係一個月搞一次Party，你話幾開心。」

每月一場直播

正所謂「多個香爐多隻鬼」，連麥記都播波，對酒吧、茶餐廳嚟講豈不是爭飯食？但森美和阿葛兩人認為完全不成問題。森美︰「嚟麥記嗰班後生細仔多，消費能力冇咁高。同埋一個月先有一場，慢慢嚟好，播得多，真係一窩蜂湧晒嚟仲弊。」阿葛認為物以罕為貴︰「客路唔同，少少哋得閒播一場冇影響㗎。一個月落嚟睇一次，好似去Party咁，先覺得矜貴。場場都播，邊得嚟咁多FreeLunch？叫《蘋果》每日送個廣告位出嚟都唔得啦！」
球迷覺得每月一場直播少又好，啱數又好，最緊要知道下場26號8點半播嘅係紐記對米杜士堡。所有直播英超嘅麥記會播同一場賽事，平日冇直播嘅日子，會透過老麥Channel播番精華片段。又話一個月一場？8月播完車仔又有紐記，咁已經兩場喇！

■連中圈都出埋，又真係幾好Feel。

■坐麥記嘅感覺，又真係幾新鮮。

■係車仔對伯明翰嗰日先咁大製作，之後嘅直播賽事唔會係咁。

侍應變球員

麥記播得波，當然唔會馬虎放幾部LCDTV就算。佢哋有20間24小時分店將換上英超主題佈置，其實都係加啲旗仔換吓牆紙。不過有5間旗艦店會唔同，直頭改為5隊強隊嘅大本營，如金鐘海富中心係總壇，收銀換晒藍色波衫外，仲有穿上曼聯、車仔等波衫的侍應出現。至於銅鑼灣怡和街會係曼聯主題設計，羅素街係阿仙奴重地，尖沙嘴北京道係利物浦天下，旺角西洋菜街則是車路士。所以各隊球迷，咪去錯人哋主場。
另外喺上述5店買餐食，可以免費獲贈一個限量nowTVFootbag，細細個波仔嚟。由8月13日開始「nowTVFootbag熱鬥」就會喺5店內舉行，比嘅就係指定時間內「的波」次數最多。殺到入決賽嘅話，仲有機會奪得5日3夜雙人來回英國機票連酒店，兼有英超入場券請你睇波。