陸詩韻（Sharon）自成為汽車節目《同車生活》主持之後，令本身愛車嘅佢對車就更加愛不釋手，今日更主持癮大發，從節目中吸收嘅車訊同知識，加上個人經驗，為車版客席介紹辣跑BMWZ43.0siACoupe，談吐溫文嘅佢不知幾有型格，愛辣愛型愛Unique，有瑕疵展現真性情才叫性感，認真專業又坦率，坦言樂在同車生活之中。記者：梁美甜 攝影：陳偉強
主持經驗睇辣跑
Sharon超愛車，雖只有年多牌齡，但每日返工都有操車，技術比好多十幾年牌SundayDriver好得多。Sharon對車有研究，加上近日任收費節目《同車生活》主持，無形中增進更多汽車知識。「識多咗車界嘅用語，而做主持最大得益係令人一諗起車，就會諗起陸詩韻。」今日就讓呢位新晉汽車代言人為車版客串，向大家介紹寶馬呢款超型嘅Z4辣跑。
眼評：外觀贏晒
Sharon態度從容地坦言：「我從未接觸過Z4Coupe。」但態度非常淡定，絕對係當主持應有嘅條件，「之前見過寶馬Z4Roadster，外形上Z4Coupe同Z4Roadster非常相似，車鼻都係好大。不過Roadster就有類似鯊魚鰓咁嘅通風口，惡形惡相啲；Z4Coupe就無咗呢啲通風口，但係頭燈依然有霸氣。由Roadster嘅軟篷變成Coupe嘅硬頂，整個線條細緻咗，齋望覺得部車好型。以前覺得Z4Roadster淨係啱男仔揸，𠵱家Z4Coupe修靚咗，女仔都揸到。」Sharon都算厲害，睇得出Z4Coupe同Z4Roadster相似，事關Z4Coupe係以Roadster為設計藍本，將原來嘅開篷加入硬頂Coupe型號，而硬頂版嘅車架比起開篷版更紮實，可以提升掟彎時嘅咬地力，感覺直接。
手評：設計簡約置物多
Sharon由車頭行去車尾，邊行邊摸，名副其實摸勻全身，仲俾佢發現尾箱加咗個特別開關：「之前都無發現寶馬車尾箱嘅開關掣係喺個廠徽度，幾特別幾方便，唔使下下走去司機位開尾箱；嘩！個尾箱以跑車款式嚟講，好大喎！齋睇外形完全睇唔出，成個人瞓落去都有位剩。」說罷更主動走進車內，「內櫳設計簡約，無太多奢侈豪華設備以減低車身重量，睇得出係以跑車為本嘅設計，方便駕駛者享受揸跑車嘅樂趣。咦……？」見Sharon從座位後拉開暗格見置物位，「呢個好！我揸車好怕塞車，人會好躁好𤷪𤺧，呢個時候就好需要零食嚟安撫呢啲情緒，所以有個位擺零食真係一流！」
試車實錄
Sharon一嚟到，已急不及待想試車，遠看呢位斯文靚女手車竟然好利落，掟彎毫不猶疑，速度快而定，好辣！
兜完幾個圈，佢落車後手舞足蹈：「車頭大腰位低但唔算難睇位，油門反應快，我都有揸開歐洲車，呢款個軚輕巧啲，揸上嚟順滑易操控。最Surprise係Z4轉波時引擎聲唔會好大，無咩車噪。我掟彎嗰陣感覺部車唔飄無咩側傾，肯定個避震做得唔錯！」部車之所以咁勁係因為副3,000c.c.直6引擎配上Double-VANOS進氣技術，最大馬力達到265匹。最誇嘅係以2,750轉就有315Nm嘅扭力輸出，連我揸都有信心起步贏其他人。Z4嘅6前速Steptronic波箱，無論想自動抑或加減波完全悉隨尊便，極速仲可以去到250km/h，超爽！
整體評估
Power夠好去得 鼻大怕睇位難
「Z4Coupe有3,000c.c.直6引擎6前速加減式Steptronic自動波，二百幾匹馬力應該好去得；不過坐姿同腰線都比較低，而個車頭又比較長，我諗睇位有啲難度。」Sharon細心分析個人見解，「就個人喜好而言，若尾箱可伸縮變多兩個位出嚟就更好，事關屋企人多，要四個位先夠坐。」咁都俾佢諗到，若然可以自由伸縮由雙座變四座又真係幾好嘅。
BMWZ43.0siACoupe規格
引擎：2,996c.c.V6DOHC
馬力：265ps/6,600rpm
扭力：315Nm/2,750rpm
傳動：6前速Steptronic半自動波
0-100km/h：5.7秒
查詢：寶馬香港（27145271）