法國總統薩爾科齊到美國享受豪華假期，喺國內引起爭議，有人話淨係租住豪華莊園已經超出佢一年嘅薪水，於是德國傳媒就計吓主要國家嘅領袖到底月薪有幾多錢。
唔包食住呢啲津貼，喺歐美國家嚟講，最高人工嘅係美國總統喬治布殊（右），月薪兌算起嚟有25.8萬港紙；其次係英國首相白高敦（左），有24.9萬；德國女總理默克爾，有21.8萬；薩爾科齊少啲，淨係得7萬；俄羅斯總統普京仲少，得5萬。
之不過，若計算埋亞洲國家，全球最高人工嘅元首就係新加坡總理李顯龍，月薪高達132萬港紙，本港特首曾蔭權加薪後有33.4萬港元，排第二；日本首相安倍晉三，逾23萬港元。但係中國國家主席胡錦濤就係「廉價勞工」，月薪得4,100咋。
中新網/《蘋果》資料室