幾年未試過打得成風，跟外甥伏在電視機前睇風暴消息，「嘩，個風屈尾拾吹番轉頭。」外甥說，「咪係，係受到另一個已經消散嘅颱風嘅殘餘所牽引而返轉頭，真係天有不測之風雲，又似一個颱風愛情故事。」我答道，外甥早已習慣舅父無厘頭答一大爛餐，未有甚麼反應，繼續注視電視上的天氣圖，「嘩，個颱風幾大個！香港幾細！咦？乜代表香港嗰一點凸咗出個海上面？」外甥望住電視自言自語，我見機不可失，連忙搶答：「咪就係因為香港細囉，細到都唔知點喺地圖邊度好，成日話香港係一塊福地所以打唔成風，其實係因為細，細到個颱風都唔知點登陸，況且香港背後仲有大片祖國土地做靠山，啲氣流七國咁亂，等閒颱風埋唔到身。」外甥望住舅父似在問這番話的主題在那裏？「咪就係細囉，香港向來勝在夠細，SmallisBeautiful，夠靈活，又機動，細就係香港嘅優點，反而𠵱家乜都要黐埋大陸一齊搞、一齊傾，表面上越來越大，實際上越嚟越煩，失去了細這個優點。」
外甥似是有所領悟，決定轉睇電影台，不再跟舅父在這題目上糾纏。風雨飄搖的八號風球晚上，思潮起伏，以電影工業為例，近年大家一窩蜂北望神州，冀盼製作出既合香港，更啱大陸的電影，當然也有成功的例子，但結果弄成三不像，香港、大陸均不受歡迎的例子佔絕大多數，既然自己識得講香港勝在夠細這道理，是否應該先搞番好本土市場再向外呢？八號風球的晚上不斷在諗，諗至轉三號風球仍未有答案，睇來有排諗。