陳秀雯帶給大家的集體回憶三部曲，過程相當豐富。早於80年代，她先憑麗的電視劇《驟雨中的陽光》飾演純情玉女一炮而紅，其後360度大變身，突變樂壇野貓，大唱「要咬你食你」的禁歌《甜蜜如軟糖》，繼而從良主演《再見亦是老婆》，憑肥師奶一角強勢入屋。46歲的秀雯半生演藝征途峯迴路轉，如今她沉醉演歌舞劇，雖然璀璨歸於平淡，但同樣活得精采。 撰文：朱倬誼
陳秀雯近日忙於與香港舞蹈團排練下月7日假香港演藝學院公演的8場歌舞劇《夢傳說》，這是她入行27年來首演歌舞劇，故心情十分興奮。論演歌舞劇，秀雯是新手，雖然現在才接演有點晚，但在大家的集體回憶中，其實她是潮流先驅，不少觀眾均對她的三個演藝歷程留下極深印象。
回憶三部曲自白
首部曲：地下情開花結果
「喺80年拍《驟雨中的陽光》呢套劇之前，我已經同叉燒（其夫婿林國雄）拍緊拖，係地下情，冇人知㗎。點知有次我哋去碧麗宮睇愛情片，散場時竟然撞到麥當雄，之後佢就搵咗我哋拍《驟》劇，越拍越出事啦，結埋婚㖭，哈哈。呢套劇係香港第一部愛情電視劇，當年收視過百分之五十，我同叉燒都俾TVB挖角，但麗的對我哋好好，有加人工，加上又係我哋嘅成長地方，所以冇走到。」
二部曲：純情女破格轉型
「嗰時由純情少女轉咗跳勁舞，唱《震蕩》時震得好辛苦，所以唱咗三年就退休，唱《甜蜜如軟糖》時成日都覺得唱嘅人唔係我，感覺同真人差好遠。嗰時電台話呢首歌係禁歌，話「要咬你食你」呢啲歌詞意識不良，但呢首歌本來係一隻糖嘅廣告歌，後尾有次我撞到填呢首歌嘅林振強，我問佢填呢首歌時諗緊乜嘢㗎？佢笑住話：『唔係你諗得咁簡單』，但佢咁講都可能係整蠱我。」
三部曲：姣婆變身肥師奶
「我唱歌唱到好攰，後尾停咗，好似普通女人咁買餸煮飯湊仔，到我個仔入咗幼兒園，又覺得唔做嘢好似脫節，姣婆守唔到寡啦，94年入無綫拍劇，拍咗《再見亦是老婆》，扮姜大偉老婆，係個肥師奶，嗰時係大熱天時着件海綿做嘅肥婆衫、笠假髮，日日焗汗，拍完瘦咗成5、6磅。對於呢個角色，我係非常勇於嘗試，做肥師奶完全冇壓力，唔使顧忌個樣，原來拍得好過癮，而肥師奶亦都係我嘅轉捩點。」
星爺無厘頭唔啱tone
陳秀雯入行20多年夥拍過無數男、女演員，但先後遇過4位神奇對手，令她非常難忘。
最不合拍對手：周星馳（90年《孖仔孖心肝》）
「係佢演佢，我演我嘅，大家個tone好唔同，佢有佢無厘頭好笑，同佢演戲，永遠唔知佢點反應，要好留心點接住，我同佢好似火星人加地球人，但唔代表唔好嘅。」
最難溝通對手：黃秋生（91年《人海驕陽》）
「我同黃秋生拍過一部電視劇，大家拍戲冇溝通，拍完之後，大家都好似唔認識，感覺上對當時劇本唔投入，大家格格不入，我未試過咁樣冇溝通法，都算係獨特印象。」
最放肆對手：歐陽震華（90年代《壹號皇庭》系列）
「我同Bobby（歐陽震華）喺劇入面好多『依泣』戲，拍第一輯時大家唔熟，後來佢知我係可以拍到嘅，所以開始肆無忌憚，會將隻腳放喺我膝頭哥。有次好好笑，係講我哋床上完事後，佢打大赤肋，但其實我係攞張氈捲住佢個身。」
最動心對手：馬景濤（96年《再見艷陽天》、97年《天長地久》、03年《愛在有情天》）
「我同佢演過三部劇，每次個角色都愛得佢好緊要，愛到心肺都嘔出嚟，初時大家合作係有啲問題，但演戲時又會好投入，唔知點解對佢會有愛情feel，嗰時仲或多或少將呢啲感覺帶返屋企。」
