上星期五中環地鐵站大擠塞，到咗星期六中午，紮鐵工人爭取加薪，與勞工處談判不成，衝上街示威，有人瞓在馬路，於是中環交通大亂，各店怕有人乘機搞事，紛紛關門暫避。
中環雪廠街/大道中交界，係交通要塞，一塞住，半山落中環就好似塞咗半隻門，車輛去晒雲咸街，頂到上花園道，另一邊嘅西行線就會塞到去灣仔。偏偏政府合署西翼就係位於雪廠街/大道中交界，啲工人與政府官員開完會，好容易聚集於此鬧事。以此觀之，他日政府總部搬咗去添馬艦，中環會寧靜好多，交通一定唔會咁擠塞，唔該曾先生快啲開展添馬艦總部工程。
據建築邦講，九七前全港進行玫瑰園工程，紮鐵工人好難請，紮鐵工人以日薪計算，每日千零蚊，日日有工開，故此紮鐵工人日日大魚大肉，到馬場投注唔知幾豪爽。現在呢？起樓工程少之又少，基建工程稀疏，建造業界失業率，全港最高，故此紮鐵工人日薪大跌，兼且又唔係日日有工開，收入由九七前嘅每月兩三萬跌到現時嘅七八千，相差好遠，紮鐵工人變成紮炮之人。但係政府無權決定人工，建築大判頭唔肯加人工，政府邊有能力調停吖，搵張建宗傾都係嘥氣，而建築商亦因標投競爭激烈（市面上工程項目少之又少），中咗標都未必有錢賺，故此堅決唔肯加人工。
如此說來，係兩難之局，不知如何解決，諗落如果搵環保、保育人士與紮鐵工人對話，場面唔知會變成點，長期嚟講，香港係一個愈趨成熟嘅城市，基建與起樓嘅工程數目，易跌難升，本地建造業專才嘅前途會係向北望，向中東望。
本地工人爭權益，往往因為工聯會與職工盟之政治爭吵而變質，今次在中環示威之工人就被工聯會屬下嘅「香港建造業紮鐵職工會」指責，兼質疑職工盟煽動工人走上街。工聯會好聽「上頭」話，張建宗梗係願意同工聯會傾多過畀面職工盟！