今個禮拜六晚，無綫將會舉行《2007中國功夫之星全球電視大賽——港、澳、台區選拔賽》，噚日六位香港參賽者同三位來自台灣嘅參賽者喺旺角舉行記者會，而擔任嘉賓嘅陸詩韻唔知係咪受到現場九位武林高手感染，連佢都話想進軍打女路線，佢前日已經為呢個節目拍咗一啲武打片段，吊威吔搞到腰痠背痛，痛到連瞓覺都瞓得唔好，但依然希望可以一嘗打女心願。
女參賽者功架十足
噚日九位參賽者當中，只有一位女參賽者，呢位來自台灣嘅36歲參賽者張侑慈，上台自我介紹時功架十足，令司儀都忍唔住要佢即場教陸詩韻擺功夫甫士影相。賽事當晚九位參賽者將會有三位出線（台灣一席、香港兩席），出線嘅參賽者稍後會去深圳參加《2007中國功夫之星全球電視大賽》，爭奪中國功夫之星嘅殊榮。
