會考狀元今年只有十個，比舊年少咗十五個，考到六A嘅尖子有四百六十七名，比舊年少咗四十五名，可見雖然有報道話今年好多學生考得成績唔錯，其實要達到尖子標準，都幾難。今年會考中英文兩科改變評分制度，由相對性拉曲綫變成絕對性個人水平，合乎國際考試大趨勢。既然改制，將過往英中、中中嘅不同試卷合埋一齊，並無問題，因為評分不再拉曲線啦嘛。考生攞到邊一級，並非與別人比較之後嘅級數，而係自己個人語文能力嘅反映。
尖子、狀元梗係叻到爆燈啦，但會考狀元攞到英文5*級而批評考試題目太淺，未免狂妄一啲。《蘋果》（八月九日）A6版引述幾位狀元話，會考英文卷太淺，只有中二中三程度，其中聖保羅女嘅狀元俞廸祈認為：「英文科只有中二、三程度，一定唔到中五，我唔係晒命，希望考評局改深份卷。」俞同學嘅英文超班，攞5*值得恭喜。照佢咁講，份英文卷咁淺，而聖保羅男女中學素來以英文深著名，俞狀元啲同學係唔係全部攞晒英文5*級呢？如果只係考到2，3，4級嘅話，聖保羅男女啲中五會考生嘅英文豈非只有中二、三程度？今年會考生有99,771人，考到英文5*級嘅有1.2%，即一千二百人，其他九萬八千五百七十一人點解以中五生身份，考會考狀元眼中嘅中二、三程度英文卷，都會攞唔到5*或3，4，5級？考評局可唔可以公布聖保羅男女、皇仁、喇沙、男拔女拔、港九華仁、港九瑪利諾等名校，究竟一共有幾多中五生考英文攞到5*級，以釋疑團。
大家如果有時間，睇吓考評局出版嘅《二○○七香港中學會考英國語文科水平參照等級描述及示例》，就知道1級與5級作文嘅分別，可以話差距甚大，5級示例零零舍舍比1級叻好多，5*級應該更好。大學收生如果以2級為最低標準，恐怕啲學生不能以英語寫termpaper！