因颱風關係，巴塞隆拿表演賽改期，友人有事不能出席，將超靚位門票相贈，開心得飛往天上，當天開會至2時，突然起身執嘢，趕睇2時半開波，一聲拜拜然後再也不理，坐車從東隧過海，十分鐘便到達東廊接近維園區域，赫然發現一條萬里車龍，密密麻麻，當堂倒抽一口凉氣。身處高速，欲跳車無從，當機立斷，決定取中環線從灣仔入攝，怎知灣仔近海皮處，車龍已如三叠潭般叠個水洩不通，再當機立斷，決定取金鐘倒行入皇后大道再行山路到大球場，結果車塞在皇后大道十五分鐘郁不到兩個車位，再再當機立斷，棄車徒步往大球場，身水身汗到場時已踢完上半場3比0。
原來紮鐵工人大佬在街頭示威，交通陷於癱瘓，爭取合理酬勞當然有權，但妨礙市民日常秩序則說不過去，前已發生的士司機大佬機場擋路事件，若然各行各業都效法這種行徑，冇幾耐就輪到市民瞓喺街抗議。
講番場波下半場，眾心儀球員已經算畀面，雖已領前3比0仍落場踢多陣，讓我有機會看見亨利、伊度奧、恩尼斯達的真身，朗拿甸奴更唔話得，在我座位附近施展假身大插花，假身動作比田雞在《少林足球》中更假，細哨名不虛傳，交足功課，經已值回票價，細細哨的出場更是Bonus，滿心歡喜。同行友人們散場時眉飛色舞，對巴塞讚不絕口，更紛紛表示會落注買巴塞成為來屆聯賽及歐冠冠軍，看來巴塞亞洲之旅不只招徠Fans，更為賭波帶來更多注碼，足球已不只是運動，更是大生意。