正當大家認定劉嘉玲情歸男友梁朝偉，佢日前仲高調大談同偉仔去印度見大寶法王嘅事，點知噚日嘉玲又直認同郭台銘仲有聯絡，女人心真係好難明。
樂做形象顧問
嘉玲噚日喺家鄉蘇州，準備接受當地政府委任佢為電影娛樂大使，幫手宣傳今屆嘅百花金雞電影節。嘉玲下午接受台灣傳媒訪問，講起郭台銘時，佢直認同對方仍有聯絡，唔會因報道而受影響，朋友間嘅發展關係會順其自然。
提到郭台銘嘅衣着唔夠入時，嘉玲即刻維護好友話：「一個人的成就不能看外表，他很努力工作，外表就其次了。」佢笑住補充話如果郭台銘聘請佢做造型顧問，就可以畀啲意見喎！
至於嘉玲喺上海新開M2酒吧，有傳郭台銘喺試業期間搵咗大班朋友捧場，嘉玲話自己唔係成日喺舖頭，可能郭生去咗佢唔知。
嘉玲喺上海起屋，最近又喺北京ParkHyatt高級公寓買咗層樓，佢話𠵱家忙於籌備王菲嘅嫣然天使基金籌款晚會，仲會喺自己生日12月8號舉行㖭。
