有啲人生成二奶命，就好似保頓領隊李森美咁，難得坐正，點知隊波五勞七傷，英超開鑼日主場輸畀紐卡素1:3，𠵱家仲慘到成為今屆英超首個被炒領隊嘅大熱門㖭。
李森美喺踢利物浦時雖則唔係正選，但勝在效力得夠耐，由75年踢到86年，所以稱得上係利記嘅老臣子。93年佢返利記做助教，之後亦有去英格蘭國家隊幫手，及後再喺05年轉去保頓；加上佢份人夠真，又識得同領隊以及班球星溝通，故此喺英球圈深得尊重。
安歷卡被大會昅中
「大儍」艾拿廸斯喺今夏離開保頓過紐卡素教波，令到李森美得以喺入行以嚟首次坐正，好多球圈中人都戥佢開心。但係人都知保頓係由艾拿廸斯一手建立，佢一走隊波即刻散晒，隊中最有級數嘅安歷卡有離心兼成為多間大會嘅羅致目標。咁到未算，最慘係李森美冇錢買人，要以上屆嘅人腳比賽，但對手就係咁簽人增強實力，試問點打呀？
保頓首仗極唔對辦
前晚保頓喺主場輸畀由艾拿廸斯領軍嘅紐記1:3，班波踢落完全唔對辦，於是啲莊家亦調低李森美成為今屆英超首個被炒領隊嘅賠率，由4.5倍變成3.5倍嘅頂頭大熱。難得李森美等咗14年先喺球會坐正，但就搞成咁，連我求大俠都戥佢心噏，唔通佢真係天生二奶命？
講開新領隊，之前失業一年嘅艾歷臣喺曼城就有個好開始，幫隊波作客贏韋斯咸，賽前佢話當日獲委任為曼城領隊時，冇英超領隊打電話恭喜佢，認真人情冷暖。𠵱家佢新上場就贏波，總算係吐氣揚眉。