容祖兒前晚以兩套性感bratop進駐亞洲博覽館，與草蜢演出拉闊音樂會，她騷胸之餘也將腰間少許豬腩肉展現在觀眾面前，不過當然與衞詩的巨腩不能同日而語。祖兒獻唱期間曾出現拍子失誤情況，跳舞又差點跣倒，幸她與草蜢的20分鐘勁歌熱舞仍能掀起高潮，博得全場掌聲。
容祖兒與草蜢前晚在亞洲博覽館演出《07拉闊第二場─容祖兒×草蜢音樂會》，祖兒分別穿上兩套bratop出場勁歌熱舞，其中她與草蜢在音樂會末段又唱又跳的20分鐘快歌部份，更掀起全晚高潮。
嘆人肉三文治
前晚以bratop上陣的祖兒表現投入，不但經常俯身露罅，腰間少許豬腩肉也顯露無遺，跳舞期間又差點跣倒地上，幸好有驚無險，而她與草蜢互唱對方歌曲時，更因拍子失誤唱快了，情況頗為尷尬。其後祖兒與蔡一智及蘇志威合唱《住家男人》，突然被兩男前後夾擊摸身，有如人肉三文治般，顯得不知所措的她惟有輕輕用手推開他們。
前晚草蜢三子與祖兒分別有個人獨唱部份，蘇志威扮張國榮及張立基獻唱《側面》及《ElectricGirl》，博得全場掌聲，而蔡一智獻唱時則有兩位性感女舞蹈員伴舞，甚有睇頭，事後他說：「我哋表現未係最好，但四個都好滿意，因為綵排得幾日。」談到祖兒跳舞跣腳，蔡一傑搶答說：「我哋都有少少甩，個台凹凸不平，你哋睇唔到啫，好跣㗎。」
祖兒透露一直希望學跳草蜢的舞步，今次如願以償，她說：「嗰20分鐘舞蹈我真係拚咗條命出嚟跳，做到好緊張呀。」
乘機互笠高帽
及後蔡一傑要求祖兒評論草蜢三子表現，祖兒即說：「我唔夠你妖啦，原來阿智可以咁勁，早知唱首《白金升降機》同阿細（蘇志威）撼過啦。」蔡一傑聞言即說：「我就冇咁蠢，唔會正面交鋒唱快歌。」而蔡一智則大讚祖兒說：「佢係呢輩女歌手最好記性嘅，又喺短時間內背晒草蜢啲歌，好犀利。」
採訪：胡比
攝影：仇志德
