吳彥祖（Daniel）跟舒淇這對影壇金童玉女，早前因合作吳宇森監製的電影《天堂口》再結片緣，二人從花瓶角色，走到今時今日能獨當一面的地步，當中同樣經歷了不少風雨，難怪人前人後他們都可以理直氣壯地高叫一聲：「我係演員！」激昂程度不下於曾特首的競選口號。 採訪：何永寧
【吳彥祖：佢脾氣好咗】
吳彥祖（Daniel）由拍攝楊凡的《美少年之戀》開始到近期爾冬陞導演的《門徒》已有10年光景；這10年間舒淇也由《玉蒲團》的三級女星一躍成為台灣金馬影后。無獨有偶，原來在《美》片中兩人已初次合作，之後再在電影《北京樂與路》中結下片緣，早前再為新晉導演陳奕利拍攝了電影《天堂口》，同劇還有張震、劉燁跟孫紅雷等一班好戲之人。Daniel跟舒淇還藉此機會為對方來一個總結。
讚舒淇有韻味
Daniel說：「舒淇喺《美少年之戀》係客串性質，真係認識佢係拍《北京樂與路》開始，嗰時覺得佢好靚，𠵱家再合作已經完全唔同，成熟有韻味咗好多，單係脾氣同耐性平靜咗好多，個人完全calm晒，見佢拍《天堂口》就知，個30年代歌女造型每日化妝要成3個鐘，以前佢發咗脾氣好耐啦。而且佢唔再在意自己係一個靚女，同一啲淨係掛住個妝嘅女演員唔同，舒淇已經由一個明星，變成為一個演員。同舒淇合作得耐，有默契，而且見到大家喺演戲上都有進步，唔似以前唔知做乜。」
入行10年，其實Daniel都經歷過低潮，他說：「入行初期電影市道唔係咁好，自己又想多啲機會去演戲，所以有個時期乜嘢戲都接，嗰時都未知演戲係乜，所以出嚟嘅角色好空洞，人仲停留喺所謂明星階段。不過周潤發都講過，唔去試去拍點知自己啱做乜嘢戲，多得嗰段時期嘅鍛煉，幫我搵到自己條路。」
盼40歲前娶妻
談到大家都關心的感情生活時，Daniel坦言現時感情穩定，希望40歲前能成家立室生兒育女，他笑說：「仔女都冇所謂，不過仔會舒服啲，女會多啲嘢擔心，因為我都做過細路，知道十幾歲嘅男仔打乜嘢主意，咪多樣嘢驚囉。」
【舒淇：佢勤力外向】
舒淇談到對吳彥祖的感覺時，則大讚他靚仔嫩口說：「嗰時同佢合作覺得佢好靚仔好嫩，其他就冇乜嘢特別，交流就冇乜，因為大家都係初入行。𠵱家再同佢拍戲，發覺佢除咗仲係咁靚仔之外，仲多咗一份內斂同成熟，覺得佢已經成為一個演員。」
爆Daniel發脾氣
舒淇續說：「佢畀我嘅感覺係好外向，同張震怕醜好唔同。佢好勤力，睇佢初初中文都講唔好，到𠵱家可以做訪問，就知佢下過一番苦功。佢喺片場經常有一個人教佢講普通話，證明佢真係好好學，最近仲去埋美國深造演技，呢份毅力真係令我自愧不如。Daniel畀我另一個印象，係佢好有耐性，唔輕易發脾氣，佢好識得尊重人，當然同時你要尊重佢，聽講喺片場試過有個導演臨時改戲冇通知佢，令佢即場發脾氣，不過呢次都係我所知唯一一次佢發難。」
無悔拍三級片
講到入行後的低潮，舒淇感觸地說：「太細個17歲就入行接戲太多，個段日子喺片場根本渾渾噩噩度過，都唔知自己做乜嘢，所以嗰陣脾氣好大，動不動就吵鬧。反而拍三級片或者三級女星對我嚟講冇造成壓力，我到𠵱家都冇後悔拍過三級片，如果唔係咁又未必有今日嘅舒淇。反而有啲人鍥而不捨，每當我有新片上時都會出番我以前嘅寫真，只係令我覺得好笑。」
談到感情，舒淇自言目前感情空白：「雖然張震同我嘅經理人公司都覺得我哋好襯，好想我哋拍拖，不過唔係囉。其實一紙婚書對我唔重要，我阿媽仲叫我唔好害人。」
吳彥祖
服裝提供：Diesel
髮型：VickwanofHairCulture
化妝：JaneLeung
場地提供：黃埔海逸酒店
舒淇
服裝提供：PauleKa
髮型：SevTsangofHairCulture
化妝：ArrisLaw
