會考放榜，本來唔關左丁山嘅事，只係校監H突然來電，傾起佢間幼稚園創辦三十年之喜與樂，左丁山想起校監H亦與校友會中學有關，於是順便問佢：「間中學會考成績如何呀？」校監H話：「𠵱家仲未知，中七生今年入大學比率有六成以上，比舊年增加好多，其中五個入港大，一個中大，一個科大。」左丁山又問：「點解入中大嘅學生只得一位？」校監H答：「據校長講，啲同學驚會考成績唔算太好，報中大會有風險！」
校監H放下電話，忽然諗到副刊編輯C呢位媽咪，放榜日一定好緊張，因為佢位資優（IQ133以上）兒子患有閱讀困難症（dyslexia）讀小學時成績唔好，五年前升中一，被派往一間經常有學生開片嘅Band5中學，編輯C幾乎喊出嚟，幾經辛苦，得校監H間校友會中學（當時係新學校）取錄。眨吓眼又五年嘞，編輯C位愛兒考成點呢。電話接通之後，編輯C笑不停口，猛話多謝學校栽培，多謝校長苦心，多謝兩位心理學家照顧，多謝教統局諒解閱讀困難症學生嘅困難，畀多啲時間佢哋答中英文試卷。左丁山等佢暫停笑聲之後，問佢：「究竟你個乖仔考成點？」
編輯C話：「全級考第二，理科成績係一A二B三C，有二十二分，中文考5級，英文3級。學校考第一嗰位亦係資優生，亦有閱讀困難症，有二十八分。」考得咁好，回原校讀中六，編輯C放下五年來嘅心頭大石，成身鬆晒，又試笑個不停。成績咁好，據編輯C講，皆因佢六年前就知道兒子讀書成績差，幾乎留班，於是周圍問人，卒之知道世界上有dyslexia這回事，美國大經紀CharlesSchwab就有此症，發達後成立一個專門網站，幫助患上此症嘅學童。編輯C搵心理學家為兒子診斷，五年來不斷有心理專家照顧兒子，而心理專家亦說服咗教統局撥款，喺幾家學校做試點，針對性咁輔導患有此症嘅學生，校監H嘅校友會中學校長甚為進取，爭取到成為試點學校，於是編輯C嘅乖仔讀咗五年中學，都受到好好嘅照顧，卒之證明咗雖有dyslexia，讀書考試唔會輸蝕太多。