唉！勞氣！英超噚晚開鑼，球迷本應興奮莫名，但事實卻係個個怨氣冲天。英超過檔NOW電視寬頻，客仔大混亂，有i-Cable的，想走又走唔到；NOW用戶想加體育台睇英超，又諸多制肘，有人話根本同㩒住搶冇分別！兩大電訊公司各師各法，苦主一籮籮，究竟邊招搞到受害者最多？不過最新消息，係Cable已在網上增設即時提交服務終止申請，如果「一切順利」，要趕走「瘟神」今次話咁易！記者：許維雅
攝影：林栢鈞、周旭文
Model：Steven、Helen
律師：法律途徑浪費金錢
記者就以下案例諮詢法律意見，律師（不願公開姓名）認為呢類小額爭拗問題不宜用法律途徑解決，因只會浪費金錢同時間。同類案件每次排期最少等一年，即使獲勝，通常只取回六至七成費用。最有效方法始終係向廣播事務管理局投訴，有關當局絕對有責任協助任何投訴，包括解約問題。加上越多人投訴，反映佢哋問題越多，到該公司續牌時會有影響。咁講，消費者都幾無奈!
第1位 攞唔到終止表格，點Cut台？
要Cut有線，不能沒有終止服務表格。以往終止有線服務，只要書面通知便可，但現在必須要填寫有線的指定表格，有人投訴即使聯絡到客戶服務員，應承會將表格Fax畀你，但好多時都係收唔到，亦冇可能影印朋友的表格一用，因為Cable寫晒客戶名稱、賬號等，等其他人想取消都必須親自打電話去。
有線回應：上網Click即可！
「為確保客戶服務終止的程序正確無誤和方便客戶填寫，有線才於服務終止表格上列明有關賬戶資料。除透過電話、郵寄或傳真索取表格外，客戶亦可於本公司網站 http://www.cabletv.com.hk即時提交服務終止申請。」
記者測試：網上遞到表
記者嘗試登入cabletv網上服務中心，最初Log-in失敗，因為佢要求住宅登記電話，並不一定係該住宅的電話號碼，而係「登記時的電話號碼」。成功登入後，會彈出一個「轉以電子賬單服務」的優惠，按繼續後唔好填寫電郵，右上角會有一個終止服務的按鈕，填上個人資料，快、靚、正！雖然終止服務日期必須係一個月後計，但始終成功交Form，尚算平反成功。
網上終止服務使用方法：
先登入 http://www.cabletv.com.hk網址，於左下角有個「網上服務中心」按鈕，Click入去。輸入自己登記時的電話號碼及身份證號碼。登入後不要輸入電郵，此時右上角有一個「終止服務」按鈕，之後填寫資料，快、靚、正！
第2位 服務熱線冇人聽?
英超直播權由Cable轉至NOW寬頻，搞到客仔大跳槽，轉台恐慌潮一觸即發。於香港，英超球迷特別多，現實的香港人立刻掀起Cut有線寬頻熱潮。終止服務唯一途徑係打去客戶服務熱線，奈何個個投訴話客戶熱線冇人聽電話，未能取得溝通，苦主最多！
有線回應：已回復正常！
「因早前客戶服務熱線中心搬遷和系統提升，引致接聽來電出現延誤。有線已增加服務人手及增加客戶溝通渠道，如增設網上終止服務程序，以解決電話服務的問題。最近，新服務中心工程已完竣啓用，客戶熱線服務已全面回復正常。」
記者測試：3分鐘有人聽
有線聲明客戶服務已回復正常，記者立刻測試，發覺的確有改善，只需3分鐘已有服務員接聽電話，大家應該可以放心。不過提醒各位，查詢電話號碼係1832832，但終止服務係需要打另一電話號碼1832898。
第3位 交還解碼器出問題要罰錢
近月一直有不少客戶投訴未能Cut台，即使Cut咗，都有人投訴交還解碼器出問題。有客戶表示Cable刁難客戶，冇清楚交代交還解碼器的地點，最後弄至因遲還，最終被罰過千港元；另外亦有網友投訴交還時，被有線稱解碼器刮花外殼，唔肯收！
有線回應：解碼器客戶還
「為方便客戶交還有線的解碼器，詳細地址必會列印於客戶終止服務確認信上。」即係依然要自己還解碼器!
第4位 自動續咗無人知
其實兩大電訊公司都有續約含糊的問題，幾時約滿永遠唔知，冇通知，直至佢哋收取費用才知道。甚至乎有人投訴連自己續咗約都唔知，因為最初只係同Sales喺電話口頭承諾，最終口同鼻拗。
有線回應：
「所有服務登記（包括續約）的細節已清楚列印於服務登記表格或服務確認信上。」魔鬼果然在細節裏！
第5位 申請時話包如今要加錢
有不少NOW舊客本來已申請ESPN同StarSport體育台，NOWSales亦講明有英超直播權，可放心申請。怎知到英超開鑼原來冇得睇，要睇要另外畀錢；想申請又得一個選擇，就係付全費$368。睇唔晒咁多台？答曰：「頂多平$10畀你。」問：「點解新客有約$250計劃？」服務員：「舊客係冇着數㗎喇！」話考慮遲啲申請，仲補句：「到時唔止呢個價錢，我哋只會越來越貴！」激到不少舊客寧願不申請。舊客一早就支持，一取得英超轉播，懶理舊客感受，只顧吸納新客，真陰功！
NOW回應：
記者電郵有關投訴問題，截稿前未有回覆。公關解釋收費調整係公司政策，問題只係可能某些服務員語氣及態度上有問題。
第6位 舊客睇英超要加監
若然NOW舊客真係唔介意加錢睇英超，卻原來連先前購買的頻道，合約全部都要「加監」，意即要齊齊加多年半，原因亦係公司規矩。明明開台時講明睇邊個台就買邊個台，為何加體育台時會被屈睇埋其他台，佢哋啲合約同規矩隨時更改，無法無天？
NOW回應：
記者電郵有關投訴問題，截稿前未有回覆。
電訊管理局：銷售服務不受管轄
記者致電電訊管理局及電郵有關查詢，得到的回覆，答案如同「愛莫能助」。「本局規管營辦商的權力及職能，祇限於《電訊條例》和該條例下發出的牌照的條款所列。至於收費電視服務的營辦商，由於該些營辦商是屬於電視廣播服務持牌商，有關牌照是基於廣播條例發出的，其銷售服務行為不受《電訊條例》所管轄……市民亦可考慮透過傳真或電郵表達意見或作進一步投訴。然而，如市民的投訴是涉及合約內容或收費的爭議，他們亦可考慮諮詢法律意見。」但係律師意見係訴諸法律只會浪費金錢喎！
街坊意見：政府要管吓
