民主派群英並起搶攻馬力遺缺，正所謂三軍未動，糧草先行，想參選除咗要有民意實力，財力都唔少得。呢次補選選舉經費上限200萬，根據紀錄，單人匹馬參選最少要使70萬至80萬，手鬆啲使100萬冇走雞，民主黨甘乃威同八方講，佢已經張羅到一定數量經費，「萬一真係參選，都要有啲本錢喺手先得。」
半年內搵200萬
何秀蘭就話未起步籌款，不過心中有數應該搞得掂，佢話最大問題係今年選完，出年又可能會參選，屆時又要使多筆，要喺半年內搵200萬返嚟，絕對唔係輕易嘅事。有人話甘乃威都有同樣煩惱，事關佢今次未必志在必出，但明年肯定會盡地一煲。
至於社民連方面，佢哋一直有上街籌款，毓民加上勞醫生號召力，相信籌募經費唔係太難，但要同時應付區議會選舉同補選兩條戰線頗吃力，佢哋係蚊型政黨，人力物力始終有限。有民主派人士同八方講，今年區選同補選，政府會補貼候選人每票10蚊，的確可以減輕財政壓力，然而要選完先收到錢，所以籌錢工作不能鬆懈。葉劉就梗係唔使憂，佢要去馬，人、財自動到位。