喺沙田舉行嘅國際馬術三項賽噚日一早比賽，好多人未瞓醒睡眼惺忪到場，入到場卻可能眼前一亮，因為以貌美聞名中東嘅約旦公主Haya終於出場，Haya公主係馬術運動員，但今次冇上陣，以國際馬術聯會主席身份觀賽。
老公大手入滙豐
雖然係皇室人員，Haya公主卻冇好架勢排場，只係有兩個相信係中東漢嘅保鑣貼身傍實，佢亦冇乜架子，坐喺貴賓席同陪客署理特首唐英年有講有笑，可能指教緊唐唐點樣欣賞馬術，不知情者應該唔知身邊個鬼妹係公主。噚日係運動場合，Haya公主着件白色襯衣，佩戴襯埋一套嘅耳環、頸鏈同手錶，唔算珠光寶氣，低調得嚟好端莊。
Haya睇完國際選手比賽就走人，去今日比賽場地雙魚河視察。據了解約旦皇室人員今次嚟香港住喺沙田帝都酒店，方便往返馬術賽場地，想親睹公主風采，可以去新城市廣場碰運氣。Haya公主今年33歲，04年同杜拜統治者（RulerofDubai）SheikhMohammadBinRashidAlMaktoum結婚，現居杜拜。呢位「駙馬」去年創立資產達700億美元嘅DubaiInternationalCapital基金，今年初大手掃入滙豐，成為主要股東之一。
Haya公主喜歡馬術，曾代表約旦參加悉尼奧運會，出年會否來港參賽就要睇未來一年表現。佢又鍾意足球，約旦隊出賽實捧場，此外，佢更獲聯合國委任為世界糧食計劃親善大使，係第一位阿拉伯人兼第一位女性大使，真係又美麗又好心哋。
馬術係貴族運動，另一公主、英女皇外孫女Zara公主因為要備戰下月舉行歐洲馬術賽無嚟香港，畀Haya公主搶晒鏡，八方希望Zara公主出年出戰奧運，同曾經係殖民地子民嘅香港人見見面。香港人對馬術興趣有限，捧場高官寥寥可數，只有周一嶽同鄧竟成因公到場，消防處處長郭晶強最有心，不過睇咗一陣就「較腳」，佢話要趕住過海入場睇巴塞。馬會行政總裁應家柏都話鍾意睇波多啲，不過佢囡囡卻好熱衷，想做馬術運動員，出年未夠火候，最快2012倫敦奧運先有資格「去馬」。