孫耀威（Eric）強勢回歸，唱片賣得！演唱會晒6嚿腹肌睇得！會考28分晒得！樣樣掂叫Fans越生愛慕！殊不知他的廚藝亦勁得！幾下拋鑊似足大廚，現場美少女嘩嘩聲歡呼拍掌；炒蜆唔用蜆，改用花蛤，豉椒、油鹽水變成金不換及辣椒膏，香口惹味到如迷魂煙，令美少女不停勁索，暈暈哋猛話：「好味呀！」
記者：廖秀娟
攝影：伍慶泉
廚藝指導：周炳昌師傅
鳴謝：中華電力提供電磁爐具
髮型：SunnyYu@HairCulture
麻甩佬的撒手鐧
大學時期一個人住宿舍，練就了幾下廚藝照顧自己生活，「住宿舍的男生，開頭就算更唔識煮餸，都會煮『麻甩佬炒飯』，即是食剩啲乜，全部炒埋一碟食；之後我學煎牛扒，原來又唔係咁難，只要件扒靚，控制好火路就會煎得好。」經過無數次把幾百元一塊的靚牛扒煎成牛肉亁，終於今天修成正果，「𠵱家我仲鍾意煎鱸魚，將魚扒一邊慢火煎，把魚皮煎到薯片咁脆，但魚肉仍然好Juicy，好好食㗎！」
原來孫耀威的媽咪及婆婆都是廚藝高超之人，「我試過一個人煮十幾人份的餸菜，仲係有前菜、幾款主菜任揀嗰種，但我完全唔覺辛苦，見佢哋食得好開心，我其實好享受！」Eric眼睛望着遠處，帶着微笑幽幽地道，「可惜𠵱家真係太忙，冇時間煮囉！只有大日子先會出擊！」不過Eric話要追女仔時，都會出吓呢招撒手鐧㗎！
泰式辣椒膏炒蜆
0hr15min（未計蜆吐沙時間）
份量：4人
每年七、八月是蜆的當造季節，做蜆菜最啱；但Eric話用花蛤比用蜆更好，「因為花蛤嘅殼比蜆薄，蜆肉仲大粒啲。」所以今次我們亦買花蛤，真係更有口感呀！
材料
花蛤900克、青紅黃椒3/4隻、葱3棵（切段）、紅辣椒1/2隻、金不換6片、香茅2棵、泰國辣椒膏2湯匙、清雞湯50毫升、鹽適量
調味：雞粉1茶匙、砂糖1/2茶匙
做法
1.將花蛤洗淨，加鹽水令其吐沙至少半日，用水煮熟後冲冷水盛起備用。
2.將香茅、金不換及辣椒膏加3湯匙油略炒，然後加入青紅黃椒及紅辣椒炒勻，放入蜆、調味、清雞湯及葱炒至亁身便可。
貼士
金不換要炒一炒才出味，但又不可炒到黃晒，要先炒辣椒再落金不換。
黑松露醬炒蝦仁
0hr45min
份量：4人
Eric炒過很多次蝦仁，今次跟周師傅商量後決定用黑松露菌炒，「試過黑松露菌的濃味，相信配清淡的蝦仁都會不錯。」結果出奇地好呢!
材料
大蝦仁600克、蘆笋100克
蝦仁醃料：雞粉/水適量
調味：黑松露菌醬1湯匙、糖1/3茶匙、雞粉3/4茶匙、生粉1/3茶匙
做法
1.將蝦去殼，啤水（放於水喉下冲水）至白身及脹身，加醃料醃半小時。
2.燒熱滾水把蘆笋浸灼至八成熟隔起，瀝亁水份。
3.燒熱鑊下油爆香黑松露醬。
4.放入蝦仁及蘆笋，兜炒至蝦仁彎起，灒酒後加入調味快速炒勻便成。
貼士
黑松露菌醬可買現成，亦可自己做。把黑松露擦亁淨後用攪拌機攪爛蒸熟便成。
紅酒雞肝煙肉卷
0hr30min
份量：16件
煙肉卷多用腸仔，Eric說要加點難度，周師傅建議用雞肝，「有少少鵝肝的口感，但又冇鵝肝咁難做，幾好㗎！」Eric話雞肝較經濟，煮得唔好都冇咁肉赤。
材料
新鮮雞肝8隻、煙肉片8片、蜜糖30毫升、紅酒少許
調味：雞粉/鹽/胡椒各少許
做法
1.用煙肉將已調味好的雞肝捲好，用牙籤固定。
2.用電磁爐以中火煎至半熟，掃上紅酒及蜜糖煎至金黃色便可。
貼士
一定要有心機慢慢煎，否則很容易煎燶！
麻甩佬炒飯
0hr15min
份量：4人
材料：火腿50克、雞蛋1隻（拂勻）、哈密瓜50克、葱花1湯匙、青豆20克、白飯400克、油3湯匙
調味：鹽2/3茶匙、糖1/2茶匙、雞粉1/3茶匙、甜辣椒醬2湯匙
做法
1.哈密瓜切粒。將火腿、青豆預先洗淨，汆水備用。
2.燒熱鑊下油，放入雞蛋炒至八成熟，加入白飯略炒、再將其他材料及調味加入再炒一會便成。
貼士
生果最好選瓜類，不容易炒爛（但木瓜例外）；士多啤梨、芒果、桃李類都不太適合。
Fans快速學兩招
Eric廚藝了得，令兩位Fans看得目瞪口呆，連隨都學吓Eric的廚技。
FansJanice學拋鑊，兩斤花蛤連成斤重的易潔鑊都控制自如，拋得利落，Eric勁讚。
Eric捉住兩人雙手加速落調味，「少少少少落，好易以為未夠，畀啲信心，一次過落夠佢。」
買定料明日教你煮餸
紅酒葡萄東坡肉
五花腩10両、花椒/八角各數粒、薑片/冰糖少許、青/紅葡萄各5粒、紅酒1杯
師傅教揀五花腩肉的肥瘦比例為1:3，肥瘦最好要有5層分佈，咁煮出來的肉才會鬆化有口感，亦唔會太膩。
富貴百子蝦
海中蝦8両、蟹子適量、西蘭花/蘆笋各2両
鹽焗烏頭
烏頭魚1條、幼鹽/海鹽各適量
蜜瓜雞腳燉螺頭湯
蜜瓜1/2磅、瘦肉4両、亁瑤柱數粒、雞腳4隻、響螺2隻、金華火腿少許