數碼達人：首創外置硬碟<br>LCD變錄影機

數碼達人：首創外置硬碟
LCD變錄影機

講起LCDTV，好多人都想起佢平薄纖巧身形，不過正因為佢體形薄身，就更有本錢去內置更多附加功能。Shinco最近推出一部可外置硬碟、備有錄影功能LCDTVRTV-3251，除咗可身兼錄影機功能外，預錄片段更可以放落PMP出街睇，夠晒方便！

記者：許福合
攝影：陳偉強
Model：Isis

133小時錄影

喺試睇呢部RTV-3251之前，佢嘅錄影機功能玩法相信更多人會感興趣。首先跟隨LCDTV會附有一個硬碟盒，能夠放入2.5吋筆記簿電腦專用硬碟，但需用家自行購買，市面上的容量暫時可支援到400GB。硬碟盒會經USB接駁RTV-3251，而機背亦留有位置可以掛上硬碟盒，不用怕無位置擺放！
錄影功能方面，可以有即時錄影及預錄功能，400GB硬碟可以最高錄影133小時，將電視劇錄起慢慢睇！除咗硬碟外，一般USB儲存裝備如記憶手指及PMP都可以接駁錄影，方便拎出街或拎去電腦播放。

畫面試睇

■內置動態補償功能，令到勁歌熱舞畫面影像穩定，鋸齒及殘影情況輕微。

■降噪效果除了令畫面更滑外，質感亦較容易顯現，尤其是頭髮部份相當清晰。

■接駁欣賞高清試片，可以見到光暗對比度高，但仍保持清晰影像，視覺層次亦高，立體感強烈。

錄影限制多

筆者試玩過RTV-3251後，覺得RTV-3251雖然具有錄影功能，不過還未能完全代替錄影機。主要係錄影的時候，只能睇乜錄乜，唔能夠睇無綫錄亞視。至於預校錄影功能設定後，更要關機才能操作，實際使用上就唔係咁方便。不過若果將RTV-3251錄影當作輔助形式，用作錄電視出街睇，就非常方便，起碼唔使自己壓片已經慳番唔少時間！除影片之外，RTV-3251亦支援JPEG相片播放，用DC影完可以立即喺32吋屏幕上慢慢欣賞。
RTV-3251規格方面，支援1080i高清畫面及HDMI介面，並且兼容HDCP，較特別係提供一個12級動態降噪功能，減少畫面雜訊。試睇時發覺畫面清晰而實淨，光度亦相當充足，最印象深刻係暗位Details都好詳細，證明畫面有一定水準！