英超聯賽，商機處處。波衫舖早着先機，英超開鑼，各球隊球衣大賣，尤其港人偏愛的曼聯球星C朗及朗尼球衣，更曾賣斷市，生意額也升五成。
部份斷貨或會加價
旺角波衫舖352大本營昨日球迷絡繹不絕，選購心儀英超球隊戰衣，負責人劉先生說，平均每人花千多元，料英超期間生意可升三、四成。其中曼聯球衣最受歡迎，昨單單一個早上已售出十多件，每件459元：「最多人鍾意，梗係7號仔（C朗）同10號仔（朗尼）啦！」
球衣戰只拉開序幕，因他說其他球隊如利物浦、車路士等表現佳時，其球衣也會暢銷：「但香港人偏心曼聯多啲，無論踢得好唔好，都買佢啲衫。」
另一波衫舖SFALO負責人Bill說，曼聯、利物浦及阿仙奴球衣大賣，部份已斷貨需補充。他估計英超熱潮會維持長時間，生意長做長有，但衫價或會因來貨少而調高。
本報記者