睇鄧達智寫新城電台「明火食神爭霸戰」之「辣組」，睇到舌頭打轉。自己不能吃辣，逢有辣味食品，一定避之則吉，所以唔識欣賞辛辣食物。一次與議員陳同枱食飯，侍應知佢口味，為佢奉上特製辣油，左丁山聞到陣味，已經心驚膽跳，今勻見鄧達智寫：「香檸味、香芋味、辣椒味、咖喱，妙在層次分明……」為之心郁郁，恨不得發夢時試吓。
呢晚戲劇K請食飯，與鄧達智同枱，問佢點解食得咁辣，佢話為時裝設計生意，走遍大江南北，乜都食，已是百毒百辣不侵。佢去四川多次，指出四川多山，地形係盆地，好少見到太陽，天氣陰暗居多，而且食水來自冰川河流，鄧達智在成都用冷水洗面，凍到震，故此四川人慣於吃辣驅寒，但多飲四川水，皮膚一定滑溜。佢咁講，令左丁山想起一位校友初到印尼工作，唔慣食辣，覺得冇啖好食，但住咗幾年之後，佢變成無辣不歡，因為印尼好濕，唔食辣唔得喎。
順便問阿鄧：「唔係話東北佳麗皮膚最靚嘅咩？」阿鄧話：「難咯，東北苦寒，風大，居民點會唔係皮膚粗糙吖，以我見過咁多模特兒，一定係江西、四川啲靚女嘅皮膚最好。上海女士集全國大成，作不得準，到江南鄉下睇吓，你就知道江南並非美女之鄉。」
未去食飯之前，在街上見到香港警察，對佢哋身上嘅淺藍色恤衫、藍色長褲，不顯眼嘅皮鞋，毫無尊敬之意，反而好耐以前嘅夏天、冬天警察制服，就留下深刻印象，覺得以前啲警察好威猛。香港警察唔着淺啡綠色短褲制服之後，形象「公安」化，似實Q多過似執法人員。以此問設計專家阿鄧，佢長歎一聲：「我批評咗現時嘅警察制服好耐咯，但冇人聽，時下興講集體回憶，有冇人呼籲警察制服應該復古呢？」原來警員制服庸俗化之後，私人機構啲實Q制服及職員制服，要盡量避免與警員制服相似，幾考設計師功夫。大家到長江中心睇吓，會以為啲保安人員威猛過「公安」化咗嘅香港警察。鄧達智為地鐵/九鐵合併後嘅港鐵設計制服，短期內會公開嘞。