這邊拆，那邊起，整個北京都投入另一次大躍進。繁忙大街由早到晚塞車塞到暈，難得每天還有幾千輛新車落地，北京人就是不吝嗇時間於無謂的舟車勞頓，最怕你花不起錢買車。這裏的香港人告訴我們，當下北京就如八、九十年代的香港，幹勁冲天，人人心雄。 北京直擊
在北京，不難碰見香港人，只是碰到你都未必分辨得出他是香港來的還是北京地道；大家的裝扮都沒有兩樣，直至他或她突然累了，忽發雅興蹲在路邊之前，你都辨不出來。「香港好少人當街當巷吐痰，呢度覺得冇嘜嘢，都吐唔中你！」30歲的展覽公司客戶總監馮瑞興說，香港人跟北京生活模式接近，除了公眾場所的一些禮儀之外。
馮瑞興洋名Tom，兩年前接納了一家跨國展覽公司的北京分公司招聘：「上京前與家人商量，覺得中國大陸正在發展中，會有較多發展空間。」他說，當初決定來北京，都有考慮奧運因素。他的公司都有接奧運project：「奧運係國際盛事，我有得參與其中，係人生寶貴經驗，對自己履歷都好有幫助。」
Tom兩年前踏足北京，就感受到這種氣氛，巴士站、地鐵站、馬路邊全是奧運宣傳廣告：「好似北京所有人都睇住個奧運，個個人都喺度倒數緊，全民都好光榮咁參與呢件盛事。」奧運熱潮帶動下，北京這兩年迅速發展，整個北京都沸騰起來：「世界上冇邊個城市會同一時間起兩條地鐵線，仲要快得咁緊要。周圍不斷起樓，好多甲級寫字樓會陸續入伙。呢度氣氛有啲似八、九十年代的香港，實有嘢做，年年一定有人工加。」
現在的北京，經濟紅火得泡沫四起。香港廣告創作人招秉恒三年多前在朝陽區光華里開設「樓尚甜品小吃」，小店旁邊正在趕工鋪新馬路，小店所在的胡同年多前已收到清拆通知，但至今尚未正式回收：「奧運係個大氣候，𠵱家成個國家有個目標，好有生氣，帶來好多商機。北京好多城市建設，高樓大廈日日食塵。但係我怕，08年後大家會好失落，唔係一下子可以恢復。我好擔心08之後個市會爆煲，我諗香港人對呢樣嘢有陰影。呢度啲人話冇事，你哋香港人就話要自己搞掂自己啫，北京唔同，國家會搞掂。」
招秉恒也有接過關於奧運宣傳廣告的合約，倡導文明。他嫌北京奧運的廣告不夠創意：「不過我哋唔能夠用香港水平去睇，香港廣告只講創意，但係呢度，太複雜太新鮮的廣告，大家係唔會明。喺北京呢度，教育式口號比較work（可行）。」
本報記者
