隔牆有耳:電腦專家愛粵曲 - 李八方

隔牆有耳:電腦專家愛粵曲 - 李八方

八號波一出人人趕收工,民政局噚日下晝公佈埋有2,000萬元款項嘅粵劇發展基金執行委員會新一屆成員名單先放工。周振基續任主席,三個新委員分別係新劍郎、王超群同古煒德,前兩者係行內老倌,古煒德係香港電腦保安事故協調中心經理,同粵劇有乜關係?
原來古煒德係戲迷,佢同八方講自細鍾意聽粵曲,去過已拆卸嘅利舞臺捧新馬仔場,屋企收埋唔少粵劇、粵曲唱片同DVD,平時會同太太拍拖入場睇大戲,有時會拉埋個仔去,不過個仔似乎未識欣賞。由於佢對戲曲藝術有興趣,又係藝發局戲曲組副主席,所以獲政府任命。佢話希望推動年輕人繼承粵劇文化,至於佢自己,「都可以唱到幾句。」新委員任期兩年。