自台灣富商郭台銘今年3月高調向劉嘉玲發表愛的宣言後，嘉玲與梁朝偉的18年情便面臨「8號風球」考驗，多次傳出戀情告急，但兩位當事人均不願作回應。前晚嘉玲出席Gucci時裝騷時終打破緘默，高調透露早前與偉仔同赴印度向大寶法王朝聖，尋求「開示」，又讚他是偉大演員，希望偉仔憑《色，戒》奪威尼斯影展影帝寶座，看來嘉玲終於從「百億情夢」中得到領悟，「台風」終於落波了。
意大利時裝名牌Gucci前晚無懼8號風球壓境，於灣仔會展舉行秋冬時裝騷，不少名人明星都「風雨不改」盛裝出席，當中包括劉嘉玲、郭富城、薛芷倫及楊千嬅等，齊齊穿上Gucci秋冬新裝到場充當「人肉衣架」，當中以早前與台灣富商郭台銘爆出戀情的嘉玲最受矚目。
指偉仔呻北京熱
今年3月，郭台銘在傳媒前向嘉玲發表「愛的宣言」，擺明向偉仔下奪愛戰書，更被拍得與嘉玲同遊海南島的照片，令嘉玲與偉仔的18年情陷於「三角」苦戰，更多次傳分手，其後嘉玲雖多次出席公開場合，但絕口不提感情事。
前晚嘉玲出席Gucci活動時明顯有備而來，表現風騷，與郭富城有講有笑兼互相hug面，她更少有地高調大談偉仔近況，嘉玲說：「偉仔喺北京拍戲好熱，工作唔係淨係講錢，應承咗人一定要完成，偉仔之前同我講化完妝，仲未着衫已經好驚，好似受罰，不過冇辦法，佢都係唔慣呢啲動作。」
獲開示心靈滿足
問到嘉玲早前被傳到印度向大寶法王朝聖一事，她說：「係同偉仔一齊去，經朋友介紹下第一次見，希望法王可以傳到智慧畀我，因為自己好多嘢都唔識。」問到她獲得法王甚麼指引時，她說：「開示，示係啓示，心靈上好大滿足，無論密宗、佛教都係好，都令人平靜心情，增長智慧，心情愉快，令人舒服，胸襟廣闊啲。」
偉仔即將憑李安執導的《色，戒》出戰威尼斯影展，問嘉玲會否陪同男友出席？她說：「唔會去，當然希望佢攞影帝，偉仔係一個好偉大嘅演員，雖然佢已經攞過好多次影帝，目標係永無止境。」是否已欣賞過《色，戒》？她說：「未，佢已經跨越一個step，去到另一層次，無論得獎與否都好好，呢個經歷完全唔同。」
此外，嘉玲的好友王菲早前生日，問她有否探望？她說：「冇見，不過之前send咗message，我哋之間係唔做送禮物嘅事，之前見過佢囡囡，好靚好得意，做咗兩次手術，好成功，𠵱家要矯形。」
採訪：羅慧敏，顏英儀
攝影：陳偉權，娛樂突發組
