早兩日介紹過熱爆美國嘅電單車真人騷《AmericanChoppers》，入面幾位主角踩入袋鼠國拍咗輯澳洲篇《AmericanChoppers:Australia》，大細Paul同阿Mike幾父子去到澳洲，失驚無神得到澳洲籍影帝羅素高爾邀請去佢農場作客，仲希望幾位大師整番架有澳洲色彩嘅電單車畀佢，父子兵居然膽粗粗挑戰羅素隊球隊，話攞靈感喎！
記者：梁美甜
公路飆車ShowQuali
幾仔爺要分道揚鑣，分開之前嚟番場公路飆車，睇開《AmericanChoppers》嘅你一定知佢哋演嘢飛車方式啦；大細Paul就返OCC（橘郡）為整澳洲特色電單車而準備，而細仔Mikey因為貪玩就同朋友留低，仲踩落南澳話繼續攞靈感喎。最後大家返晒去OCC整車，過程當然唔容易，不過最後整出嚟嘅車又真係幾「炫」，唔怪得美國紅星韋史密夫、梅利，甚至Nike、Wendy's、NASA等名牌都搵佢哋設計電單車。父子兵仲Hit到連SONY同XBOX都借佢哋個朵嚟出TVGames㖭！
解構《超炫美式機車：澳洲》
羅素主場教路
父子兵走到羅素個農場食飯搞搞震不特止，仲同羅素嘅欖球隊嚟一場友誼賽，雖則有影帝教路啫，之但係人哋支球隊係專業㗎嘛，結果係點其實唔重要，反而唔好錯過羅素嘅教波片段，雖然佢無《帝國驕雄》嗰陣咁好狀態，但都算係咁，都仲幾Man。之後父子兵仲走去參觀SharkDiveExtreme（鯊魚全接觸），叫得Extreme就一定好激，所以大Paul就有事發生嘞，至於係咩事，就留番你自己睇電視喇！
人物夠真夠性格
呢套電視節目拍攝手法好寫實兼有點紀錄片味道，而且美國文化總有幾句粗口配搭，而真人騷度的確個個都肆無忌憚咁大爆粗口囉！節目見街就梗係「嘟」晒啲粗口啦，所以當日香港播《AmericanChoppers》嘅時候「嘟」到暈。
我最鍾意細仔Mikey，雖然佢無阿哥細Paul咁靚仔，仲要頭髮蓬鬆兼大肚腩，但佢係最搞笑最搶嗰個，一班麻甩佬嘈到要開拖之際，Mikey會來幾句妙語連珠，場面即時和諧番晒，勁搞鬼！
《超炫美式機車：澳洲》第二、三集
播映日期：8月16日及23日（星期四）
播映時間：8:00pm
播放頻道：DiscoveryChannel
