聽日就係農曆七月初一，阿媽話，呢個時候係鬼門關大開嘅日子，切忌亂講嘢，最好咪出夜街！以前就話靠嚇啫，𠵱家咁大個仔，使乜驚呀！但訪問咗玄學家麥玲玲師傅之後，佢亦指出農曆七月真係有好多嘢需要避忌，盡量少做為妙。都係嗰句：寧可信其有，不可信其無。
記者：陳國輝
攝影：伍慶泉
Model：Ricky
麥玲玲師傅
Top 1
忌行樓梯邊
通常住大廈嘅人，都冇需要行樓梯返屋企，但萬一全幢冇晒電兼冇𨋢搭，咁梗係焗行啦！師傅話，樓梯位置屬於陰氣比較集中嘅地方，如果夜麻麻又冇得揀，就盡量避免沿扶手或靠牆邊走，改由中間行，咁就可以減低遇上靈體嘅機會。
Top 2
忌落沙灘游水
夏日炎炎，個個都鍾意去沙灘游水消暑。不過農曆七月就要小心啲，皆因唔少寃魂曾葬身於大海，傳聞話趁鬼門關大開，佢哋會喺海入面搵替身，即係做戲成日講的「鬼掹腳」。師傅仲話特別係夜晚最好咪落水！
Top 3
忌到墳場廟宇
逢人皆知，墳場係靈體最集中嘅場所，但大家未必會諗到，原來平時拜神嘅廟宇，農曆七月亦要避免踏足。師傅話，夜晚11點至第二朝早上7點，更盡可能避免出街，留番喺屋企，因為呢段時間係陰氣比較重嘅時段。
Top 4
忌拉埋天窗
屋企人嘅喜慶事情，例如結婚擺喜酒、BB擺滿月酒等都盡可能避免。
Top 5
忌搬屋
搬屋都需要揀啱靚日子，師傅話農曆七月唔多適合，就算遇上收樓或者租約期滿等問題，亦避免選擇喺踏正農曆七月十四前後五日內搬遷。
Top 6
忌坐第一排
唔係講睇電影，而係農曆七月做畀靈體欣賞嘅大戲，俗稱「神功戲」，師傅話千祈唔好爭坐第一排，皆因早已「Reserved」咗。
Top 7
忌家居裝修
師傅話，喺農曆七月盡可能避免進行家居裝修，如果由六月份嗰陣已經裝修緊，則可繼續。
Top 8
忌穿紅黑衣服
穿着紅、黑色衣服容易招惹靈體，應要避免。師傅建議，農曆七月可穿上黃、白色衫，因略帶符色，有辟邪作用。
Top 9
忌落吧卡拉OK
一啲環境比較陰暗嘅地方，例如酒吧、卡拉OK等都盡量避免唔好去，因為農曆七月容易聚集靈體。
Top 10
忌旅遊搭飛機
師傅話，農曆七月較容易發生交通意外，例如旅遊等應該避免，亦最好少搭飛機。