今年40歲嘅金像影后妮歌潔曼（NicoleKidman）可謂越老越吃香，片約不絕。下周四（8月23日）喺本港上映嘅《無恐不入》（TheInvasion），就係妮歌夥拍新任占士邦丹尼爾基格（DanielCraig）嘅最新驚慄作品。近日天氣炎熱，到戲院嚇餐飽，標吓冷汗都不失為消暑妙方。 撰文：戶川淳
改編自美國小說嘅《無恐不入》，喺56年、78年及93年三度被拍成電影《天外奪命花》（InvasionoftheBodySatchers）。踏入21世紀，電影內容都與時並進，透過外星人入侵，道出現代全球性疫病、社會同政治紛爭等大問題。對於監製嚟講，外星人嘅真身點樣核突並非主菜，最重要係佢哋點樣令地球人心惶惶，唔聲唔聲征服人類嘅恐懼感至係電影恐怖元素。
趁瞓覺入侵人類
扮演華盛頓精神科醫生嘅妮歌，遇上一位聲稱丈夫已變質嘅病人，從而將美國有不明太空船爆炸嘅新聞報道聯繫埋一齊。原來喺太空船殘骸入面遺留咗啲外星生物，任何人同佢哋接觸後都會性情大變，變得冇晒喜怒哀樂。喺疾病中心工作嘅妮歌前夫就係第一批被感染嘅人，佢之後仲捉走自己個仔，於是妮歌就搵埋好友丹尼爾基格一齊搵仔，試圖解決呢個地球危機。
妮歌同丹尼爾發現，外星生物只能夠喺人類瞓着覺嗰陣入侵，令人類變成喪屍，要防止被外星人感染嘅最有效方法就係唔瞓覺，但亦因為越來越多人感染，正常人為咗自保，個個扮成木口木面。
陰暗氣氛夠震撼
妮歌一邊頂住睡意，一邊努力搵仔，因為兒子係唯一受感染而冇發作嘅人。電影入面嘅外星人查實一啲都唔蠢，佢哋專揀啲美國高級政府官員、執法人員同商界巨人入侵，目的要喺最短時間控制全國。
喺78年拍攝嘅版本結果係正不能勝邪，但今次劇情暗藏對付外星人嘅方法，相信同舊版嘅結局會好唔同。擔任電影監製嘅祖舒路華（JoelSilver），曾經監製《22世紀殺人網絡》（Matrix）系列。至於德國導演奧利華希舒碧基（OliverHirschbiegel）就係《希特拉的最後12夜》（Downfall）嘅導演，佢處理陰沉氣氛同壓迫力都有一手，加埋今時今日嘅特技，令電影製造出嚟嘅恐慌，比前兩個版本更具震撼力。
幕後小八卦：為1.3億險喪命
《無恐不入》原本喺上年已經拍起，但華納電影公司嫌動作場面唔夠，要搵《22世紀殺人網絡》嘅幕後班底重寫劇本同補拍。就係因為要補拍，令妮歌喺今年1月底拍攝其中一場揸車逃避外星喪屍追逐嘅戲份時，不幸發生車禍。當時妮歌架道具車係安置喺一輛拖車尾嘅車架上，因為拖車轉急彎時跣胎，將妮歌拋出道具車外，好彩到醫療中心檢查後冇大礙。不過，片商咁緊張都係唔想齣片有任何錯失，事關電影製作費好高，單係妮歌片酬，就係佢從影以來最高片酬嘅1,700萬美元（約1.32億港元）。