個風好哋哋過咗都可以吹番轉頭，呢個世界真係乜都可以發生，噚日中途因打風而少半日市，真係福禍難料。噚日市況混亂之下，竟然都跑出咗幾隻急升股，其中升幅最大係139控股（139），收市急升32%，不過成交額只得2700萬銀，唔稱得上係當炒股。
139控股上月底才透過配售新股以及發行CB大舉集資約3億元，根據有關通告，集資用途竟然係未有，只係話會為公司物色可帶來優厚中期資本收益之策略性投資項目。
根據往績，139控股曾在濠賭熱潮近尾聲時宣佈收購澳門京澳酒店，結果係未能通過股東特別大會而交易不成，去年9月，該公司又宣佈以1.5億元購入一內地公司，據公告表示，此公司在內蒙古生產、銷售甲醇及從事煤炭開採的業務，公佈後139控股成功集資，但最後結果又係因取不到足夠銀行融資發展項目而取消。
今次139控股選擇大舉集資，同時唔再宣佈會搞乜嘢項目，結果會否同上兩次唔同？今次集資要通過下周三嘅股東特別大會，同大跌市嚟掃高股價有無關係？明白以上事件，再加上往績咁差，應該唔會有太多散戶落叠。
金匡有集資壓力
同樣係搞甲醇，金匡（286）復牌急跌後連升兩日。呢個甲醇項目又係位於內蒙古，點解咁興內蒙搞甲醇？因為甲醇係以煤為原料提煉成用於塑膠或其他用途的化學產品，要搵煤，內蒙大把。通告話公司現時仍未取得任何煤礦或開採權，但正向內地政府爭取一個煤礦的勘探權，該煤礦距離甲醇廠房大約220公里。生產甲醇需要大量資金，金匡日後再有集資計劃唔應該覺得奇怪。