金朝陽（878）由7月9日高位6.4元開始調整，短短一個月跌咗40%。插到開巷之際，又係兜底時。金朝陽最新NAV11.7元，現價（3.79元）折讓高達67.6%，有咁嘅NAV折讓墊底，已經冇有好怕。又金朝陽去年以嚟，持續出售非核心性物業套現，繼上年11月出售銅鑼灣蓮花宮西街物業，今年5月公佈再出售銅鑼灣寶靈頓道物業，售價2.3億銀，估計獲利9000萬銀。
金朝陽趁旺市頻售資產套現，連埋最快第2季推售西貢住宅物業，順風順水，估計現金回籠可以貼近4億銀，08年度（12月底止）業績仲實淨之餘，對集團紓減債務，亦有好大幫助。RSI已經跌到落20，再跌仲超賣，短線吼實250日線3.25元撈底。中線博翻半番見4.87元，NAV折讓仲喺50%樓下。
路訊通大把子彈
路訊通（888）06年底止揸住現金6.22億銀，扣埋短期借貸後，淨現金高達5.8億銀，等如每股0.58元，係現價76%，淨現金水平吸引到爆。呢期環球講緊信貸危機，路訊通呢隻現金牛，大把子彈好穩陣。
路訊通最新NAV0.86元，現價（0.76元）輕微折讓11%，P/B唔過1倍。同類股大賀媒體（8243），P/B講緊3倍水位，路訊通平一大截。呢轉短打，博升20%到0.91元，P/B都係1.05倍。
錢雋