美國僱主品牌管理公司優信諮詢（Universum）最近做咗項調查，發現美國大學生畢業後，最希望去著名網絡公司Google打工。不過，《華爾街日報》調查顯示，有54%網民話，𠵱家唔係做緊大學時代立志要做嘅工作；只有29%人話「係」；剩低17%網友講：「我讀大學時都唔知將來要做乜職業。」
jimherrell喺《華爾街日報》討論區話：「我喺大學主修英文，當時心目中嘅理想職業係電影編劇，但結果我畢業後入咗間對冲基金，做『垃圾債券』交易員，做到23歲就撈到盤滿缽滿。」
人工高怕乜轉行
markjhouse講：「我本來修讀娛樂業管理學，但喺90年代中期轉行做資訊保安工作，因為當時IT（資訊科技）業好吃香，人工好高，我又要儲錢結婚，所以加入IT業。」
splwin話：「好多人需要一段時間，先知乜嘢職業最適合自己，例如我做咗軟件工程師好多年，先發覺自己原本唔鍾意IT業嘅公司文化，所以考慮緊轉行教書。」
優信諮詢嘅調查發現，今年美國大學生最理想嘅僱主，依次係：（1）Google；（2）廸士尼；（3）蘋果公司；（4）美國國務院；（5）維持和平部隊；（6）中央情報局；（7）羅兵咸永道會計師事務所；（8）微軟；（9）聯邦調查局；（10）「為美國而教」工程（TeachforAmerica），即係自願花兩年時間去美國最窮嘅學校教書。