法巴3隻基金停咗，搞到歐洲金融市場「立立亂」拆息大幅抽高，銀行同業市場近乎停頓，好多銀行借唔到錢，歐洲央行立即向市場開水喉，4厘息，話無限量，花旗嗰邊都一樣，驚啲銀行唔掂，聯儲局都向市場射水，結果銀行嘅混亂情況暫時穩定番，不過歐美股市跌到一仆一碌，花旗股市唔見咗成400點收市。
花旗咁跌法，亞洲股市梗係冇運行，港股跌咗646點收市，大市成交只係600幾億，並唔係沽壓輕，而係8號風球高高掛，港交所（388）晏晝兩點九停市，港股提早個幾鐘收市，是禍是福，就要睇昨晚花旗同歐洲嘅股市點走。
除歐洲央行同聯儲局之外，好多央行注資或表明隨時會注資入金融體系，大家𠵱家應該好清楚所謂「信貸危機」係乜嘢，有幾咁厲害。注資入市場係要市場有秩序，同解決次按危機同信貸危機冇乜關係，商業銀行解決咗資金周轉嘅問題，唔代表佢哋會繼續放數畀投資銀行同對冲基金，或者會暫停追數，因為嗰個係信貸問題而唔係資金周轉問題。呢場風暴仲未過去，不過各大央行可能會聯手喺市場搞啲動作，股市將會好波動，呢個肯定唔係搏命嘅時候，大家都係要小心啲。
恒生C輪5695：恒生（011）昨收118.10元，回試10日線買盤積極，下個支持位115元，以恒生嘅前景，115至118元區域應可以吸引基金買盤，恒生C輪5695可炒短線。隻輪昨收67仙，有效槓桿率8.8倍，正股彈上123元，5695應該喺94仙樓上，正股跌穿115元止蝕。