黃宇詩窺心事 - 左丁山

黃宇詩窺心事 - 左丁山

戲劇K推出新戲《窺心事》,請埋男女演員見吓班老友。社長M勤力得好緊要,成個記者咁款,一邊聽戲劇K講解,一邊發問,更不停咁寫筆記,照計社長M日理萬機,管住報紙集團盤大生意,何以做埋訪問嗰份?後來先知道,社長M在集團轄下一本消閒雜誌開闢咗一個專欄,親自執筆寫公關週記,所以對有興趣、有趣味之事,一概以筆記下,以免掛一漏萬。
社長M如此專業,左丁山自嘆不如,唔怪得社長M可以寫字寫出頭,與壹仔嘅社長Y實在係一時瑜亮,而左丁山就只係爬格子動物,隨時聽從老闆吩咐,自動失蹤。
戲劇K話《窺心事》改編自英國黑色喜劇WhattheButlerSaw,原著人係已故嘅英國編劇家JoeOrton(呢位鬼才不幸被同居男友用鐵鎚扑死)。點解叫做黑色喜劇?戲劇K話英文叫做farce,具有荒謬、荒唐特質嘅喜劇,有人譯之為「鬧劇」,但戲劇K認為「鬧」有胡鬧、亂嚟嘅含意,與原文意義不符,所以佢認為黑色喜劇係farce嘅更好繙譯。
《窺心事》有六個演員,不分上下半場,一個場景演足二小時,極考演員工夫。左丁山留意到贊助商係「黛安芬」,於是問戲劇K:「喂,演員着內衣褲,觀眾見唔到嘅啫,黛安芬贊助嚟做乜?」戲劇K騎騎笑:「梗係睇得見啦,世姪女黃宇詩會有大膽演出,幾乎全裸,但我哋有特別安排保護佢!」黃宇詩就係女主角,與戲劇K女朋友焦媛同場演出,對佢肯定係一場挑戰。黃宇詩係邊個呢?左丁山第一次見到佢,問佢:「你係全職演員呀?平時喺邊度做事?」黃宇詩猛咁笑:「我以前喺UBC讀theatre,𠵱家做電視節目主持,聽阿爸講戲講得多,我幾鍾意acting㗎!」左丁山於是又問:「令尊翁係邊一位?」戲劇K、美食L等聽到,笑到架架聲。黃宇詩話:「先父叫做黃霑。」哎吔吔,身旁靚女竟係霑叔嘅千金,左丁山有眼不識,皆因平時冇睇電視,唔睇娛樂版之故。既然如此,或者要去葵青劇院欣賞黃宇詩大膽演出《窺心事》。