圈中好多前輩級嘅演員係好有演員道德，所以拍攝期間，佢哋嘅要求特別高。關仁聽講「癲尼姐」係表表者，話說佢早排幫「毛冷台」拍劇，佢就要求多多，除咗成日要改劇本改對白外，有一次同啱啱過檔毛冷台嘅姐仔「二索琪」做對手戲，其實二索琪份人一樣奄尖腥悶，麻麻煩煩，話說嗰場戲講佢哋飲湯，好簡單嘅一場戲順利拍完，二索琪拍完就拿拿臨換衫收工，點知癲尼姐事後諗到碗湯放少咗幾粒南北杏，竟然要求重拍，立即搵劇組啲人急召二索琪返嚟，為咗咁小問題，二索琪梗係唔制，自此兩女就開始唔妥。關仁聽到都覺得問題唔大，癲尼姐嘅要求似乎就吹毛求疵咗啲，都唔知佢係為咗部劇，定係為咗啖氣囉。