8月8號「0808」呢對數字對中國人嚟講應該係好意頭，但對於啱啱病逝嘅民建聯主席馬力嚟講就唔多「老利」。八方記得三年前，即係04年立法會選舉嗰年，馬力就係喺8月8日召開記者會，宣佈自己患上結腸癌，然後就急急到廣州做手術醫病。
三左派人同地離世
馬力病中苦戰當選，不過勝出卻唔代表轉運，三年之後，馬力都係捱唔住癌魔侵襲而過身，最離奇嘅係，佢離世嘅日期，亦係8月8號，有時世事嘅嘢，真係巧合到令人難以置信。有人好感慨馬力英年早逝，據八方了解，國家今次出盡全力治療馬力，佢入住嗰間廣州中山大學附屬腫瘤醫院，頂級大國手雲集，而馬力生前透露，主診醫生曾幫已故前副總理黃菊醫病，可見國家對佢幾咁重視。
廣州呢間腫瘤醫院喺國內好出名，喺腫瘤科醫院排名第一，集醫療、教學、科研於一身，亦係世界衞生組織（WHO）癌症研究合作中心，八方聽聞三位同樣因癌病過身嘅左派紅人，包括港區人大代表鄔維庸同李澤添，以及上屆立法會進出口界議員許長青，都曾經喺呢間醫院接受治療。