梁詠琪愛單粒鑽環
「我屋企有40幾對耳環，呢對Chanel耳環係自己買嘅，大約千幾蚊，我唔係刻意追求名牌，只係咁啱覺得個款啱我，我較為鍾意young（年輕）啲嘅款式，所以通常揀啲一粒嘅款式，活動都方便啲，又易襯衫，比較少戴一揪嘢嘅款，因為會老成啲。鑽石耳環係女藝人必備嘅，因為要因應場合襯衫用，出席隆重宴會就最啱。」
曹敏莉圈圈襯面形
「我最鍾意就係圈圈耳環，所以屋企最多就係呢類型的耳環，有金、有銀、有膠，都成幾十對，因為圈圈簡單得來又易襯嘢，同埋本身我個面形比較長，襯番圓形同埋比較長形嘅耳環，好似吊墜形嘅耳環都係好啱我。」
周倩圯磨薑穿耳窿
「呢對星星耳環係我之前喺英國買嘅，只係300幾蚊港紙，自己平日買耳環都係睇眼緣，適合自己就會買，好多種類都有，好似鑽石、吊掛嘅耳環，其實我好細個已經穿耳，但當時係用好古老嘅磨薑方式，不過因為當時只得4、5歲，自己都唔記得有幾痛，𠵱家自己有近80多對耳環，都係平日戴，反而鑽石耳環我就會用嚟收藏囉。」
李綺雯長條形瘦面
「我小學二年班貪靚，第一次穿耳窿，後來因為發炎所以埋咗口，兩年後死心不息都要再穿過，我雙耳比較敏感，如果戴膠耳環好易發炎，不過我塊面比較肥，我覺得戴一啲長耳環會顯得塊面瘦啲，𠵱家戴嘅係VivienneWestwood嘅，係舊年生日朋友送㗎。」
採訪、攝影：張俊銘、駱華齡、楊潔雯
