暑假幾時都係親子活動好時機，廿四孝老竇阿Wing，早就為囝囝肥Ru準備咗好節目。呢日，Wing揸住佢架七人家庭車HondaStreamRSZ出發。咦，點解本來斯文到痹嘅Stream，居然帶有辣跑味道？再睇埋兩父子，一身車隊制服Look，原來暑期活動竟然係去劈車！
記者：黎頌詩 攝影：伍慶泉
住家男人都要型
唔係啩？帶埋阿仔，仲要係家庭車，點劈呀？大家咪激動，睇真先講。唔少人都知Honda嘅Stream一直係人氣家庭車，攞嚟改裝似乎九唔搭八，勢估唔到Stream原來係熱改車款之一。雖然有啲意外，但原因其實唔難埋解，一眾住家男人平日已經要老老土土揸架家庭車照顧家人，想喺「例行公事」之外攞番啲駕駛樂趣都好正常，將日常用車加工，可以一口氣滿足兩個願望，夠大條道理喇啩。
斯文變打仔
駕駛樂趣其實都可以分好多層次，有啲人只重外表，執靚個樣已滿足。就好似老竇Wing呢架StreamRSZ咁，一睇已經醒目搶眼；全車加包圍，車頭同車尾換上銀白Carbon冚，我C記就最欣賞車尾嗰隻附有LED燈嘅定風翼，超型！就咁執兩執，就令本來標榜運動感，但就斯斯文文嘅StreamRSZ換上一身濃烈跑味。
原裝RSZ運動感最強部份要算內櫳鋪排，淨係睇黑皮配銀色金屬嘅三幅式軚盤已經跑格突出，加埋中控台同車門嘅金屬裝飾，可以話整容前都夠晒靚，不過將前排換成特別為StreamRSZ而設嘅Bride座椅，跑味更入型入格，戰鬥感大提升。再喺中控台加多個DVD影音系統，等老婆Shopping都唔怕悶親啦！
變矮仔更型
如果要終極大變身，咁當然要連「內臟」都執執佢。對於車嚟講，要型仔首先要變矮仔——將車身降低。除咗美觀之餘，更加係降低風阻、增加速度嘅指定動作。要掟彎更爽，嗰四條闊版跑車胎軨就幫到你，因為咬地性更強，喺彎位更有駕駛感。再睇深入啲，車底嗰套鋁合金結構架原來都功不可沒，輕巧而硬度驚人嘅太空金屬，增加車架剛性，減低轉彎時車身扭曲程度。要斯文車徹底爆發辣味，仲有好多地方要加工，如迫力皮、迫力碟、火嘴、風隔等。
咪講咁多，試車最實際；C記一於參加老竇Wing同佢囝囝嘅親子活動。改裝後嘅座椅畀到你十足車手感覺，過癮！調低咗嘅車身，喺一般路面仍然保持穩定性。一加速，明顯更加有力，加埋本來無可能出現嘅轟轟尾喉咆哮聲，的確令呢部家庭車充滿跑味。
《蘋果》優惠套餐
毋須羨慕今日呢部改到咁勁嘅七人車，事關阿Wing話都有着數套餐畀《蘋果》讀者，當中包括高流量纖維風隔、冷氣風隔、金屬火嘴4支、鋁合金前架、安裝連Check車等，原價要$2,512，套餐價只需$1,999，啱心水就打畀Spec-R啦。
HondaStreamRSZ規格
引擎：1,997c.c.
馬力：150ps/6,200rpm
扭力：19.4kgm/4,200rpm
傳動：7前速自動波
查詢：Spec-R（23628007）